ബീഹാർ തെരഞ്ഞെടുപ്പിലെ ദയനീയ പ്രകടനത്തെ തുടർന്ന് പ്രശാന്ത് കിഷോറിന്റെ നേതൃത്വത്തിലുള്ള ജൻ സുരാജ് പാർട്ടി പഞ്ചായത്ത് തലം മുതൽ സംസ്ഥാന തലം വരെയുള്ള എല്ലാ യൂണിറ്റുകളും പിരിച്ചുവിട്ടു.
അടുത്ത ഒന്നര മാസത്തിനുള്ളിൽ പുതിയ യൂണിറ്റുകൾ രൂപീകരിക്കുമെന്ന് പാർട്ടി വക്താവ് സയ്യിദ് മസിഹ് ഉദ്ദീൻ പ്രസ്താവനയിൽ പറഞ്ഞു. സംസ്ഥാന പ്രസിഡന്റ് മനോജ് ഭാരതിയുടെ അധ്യക്ഷതയിൽ പട്‌നയിൽ ചേർന്ന പാർട്ടിയുടെ ദേശീയ കൗൺസിൽ യോഗത്തിലാണ് തീരുമാനം. മുൻ സൈനിക ഉപമേധാവി എസ്.കെ. സിംഗ്, മുൻ കേന്ദ്രമന്ത്രി രാമചന്ദ്ര പ്രസാദ് സിംഗ്, മുതിർന്ന അഭിഭാഷകൻ വൈ.വി. ഗിരി തുടങ്ങിയ പാർട്ടി നേതാക്കൾക്കൊപ്പം കിഷോറും യോഗത്തിൽ പങ്കെടുത്തു.
“സംസ്ഥാനത്തെ 12 ഡിവിഷനുകളുടെയും ഉത്തരവാദിത്തം പാർട്ടി മുതിർന്ന നേതാക്കൾക്ക് നൽകിയിട്ടുണ്ട്, അവിടെ അവർ ഫലപ്രദവും സജീവവുമായ ഒരു സംഘടനാ ഘടന പുനർനിർമ്മിക്കും. പരാജയത്തിന്റെ കാരണങ്ങൾ തിരിച്ചറിയുന്നതിനും അച്ചടക്കരാഹിത്യമോ ആഭ്യന്തര വഞ്ചനയോ നടത്തിയതിന് കുറ്റക്കാരായ നേതാക്കളെക്കുറിച്ച് റിപ്പോർട്ട് സമർപ്പിക്കുന്നതിനും പാർട്ടി നേതാക്കളുടെ ഈ സംഘം വിപുലമായ ചർച്ചകൾ നടത്തും,” പ്രസ്താവനയിൽ പറയുന്നു. നിയമസഭാ തെരഞ്ഞെടുപ്പിൽ ജൻ സുരാജ് പാർട്ടിക്ക് അക്കൗണ്ട് തുറക്കാൻ കഴിഞ്ഞിരുന്നില്ല. മിക്ക സ്ഥാനാർത്ഥികൾക്കും കെട്ടിവച്ച പണം വരെ നഷ്ടപ്പെട്ടിരുന്നു.
