ആർട്ടിഫിഷ്യൽ ഇന്റലിജൻസിന്റെ ആവിർഭാവം സമൂഹത്തിൽ വലിയ തടസം സൃഷ്ടിക്കുമെന്ന് ഗൂഗിളിന്റെ മുൻ ചീഫ് ബിസിനസ് ഓഫീസറായ മോ ഗൗദത്ത്. എഐ ജോലികളെല്ലാം കയ്യടക്കുമെന്നും സമൂഹത്തിൽ മധ്യവർഗം ഉണ്ടാവില്ലെന്നും ഗൗദത്ത് പറഞ്ഞു. 2018 ലാണ് ഗൗദത്ത് ഗൂഗിൾ വിട്ടത്.
സോഫ്റ്റ് വെയർ എഞ്ചിനീയർമാർ, ഡെവലപ്പർമാർ, സിഇഒമാർ, പോഡ്കാസ്റ്റർമാർ എന്നിങ്ങനെ ആരെയും വിടാതെ വൈറ്റ് കോളർ ജോലികളെയെല്ലാം എഐ ഇല്ലായ്മ ചെയ്യും. 2027 ആദ്യം മുതൽ തന്നെ ആ ‘നരകം’ ആരംഭിക്കുമെന്നും ഗൗദത്ത് പറഞ്ഞു. സ്വർഗം ലഭിക്കുന്നതിന് മുമ്പ് അടുത്ത 15 വർഷക്കാലം നമുക്ക് നരകമായിരിക്കുമെന്ന് ഗൗദത്ത് ബ്രിട്ടീഷ് സംരംഭകനായ സ്റ്റീവൻ ബാർട്ട്ലെറ്റിനൊപ്പമുള്ള ഡയറി ഓഫ് എ സിഇഒ എന്ന പോഡ്കാസ്റ്റിൽ പറഞ്ഞു.
ഉദാഹരണമായി സ്വന്തം സ്റ്റാർട്ടപ്പിനെ തന്നെയാണ് ഗൗദത്ത് ചൂണ്ടിക്കാണിക്കുന്നത്. വൈകാരികതയിലും ബന്ധങ്ങളിലും കേന്ദ്രീകരിച്ചുള്ള എഐ വികസിപ്പിക്കുന്ന Emma.love എന്ന സ്റ്റാർട്ടപ്പിൽ വെറും മൂന്ന് പേർ മാത്രമാണ് ജോലിചെയ്യുന്നതെന്ന് ഗൗദത്ത് പറയുന്നു. മുമ്പ് ഒരു സ്റ്റാർട്ടപ്പിൽ 350 ഡെവലപ്പർമാരെങ്കിലും ഉണ്ടാകുമായിരുന്നു. വാസ്തവത്തിൽ പോഡ്കാസ്റ്റർ പോലും മാറ്റിസ്ഥാപിക്കപ്പെടും. ഗൗദത്ത് പറഞ്ഞു.
ഉപജീവന മാർഗവും ലക്ഷ്യബോധവും നഷ്ടപ്പെടുന്നത് മാനസികാരോഗ്യ പ്രശ്നങ്ങൾ വർധിക്കുന്നതിന് വഴിവെക്കുമെന്നും എഐ സമൂഹത്തിൽ വലിയ അശാന്തി സൃഷ്ടിക്കുമെന്നും ഗൗദത്ത് പറഞ്ഞു. ഉന്നതരായ 0.1 ശതമാനത്തിലല്ല നിങ്ങൾ എങ്കിൽ, നിങ്ങളൊരു സാധാരണക്കാരനായിരിക്കുമെന്നും മധ്യവർഗം ഉണ്ടാവില്ലെന്നും ഗൗദത്ത് പ്രവചിക്കുന്നു. ആർട്ടിഫിഷ്യൽ ജനറൽ ഇന്റലിജൻസ് (എജിഐ) എല്ലാത്തിലും മനുഷ്യരേക്കാൾ മെച്ചപ്പെട്ടതായിരിക്കുമെന്നും ഗൗദത്ത് കൂട്ടിച്ചേർത്തു.
