രാജ്യത്ത് വാണിജ്യ എൽ.പി.ജി (Commercial LPG) സിലിണ്ടറുകളുടെ ക്ഷാമം രൂക്ഷമാകുന്നതിനിടെ പ്രധാനമന്ത്രി നരേന്ദ്ര മോദിക്കെതിരെ രൂക്ഷവിമർശനവുമായി പ്രതിപക്ഷ നേതാവ് രാഹുൽ ഗാന്ധി. ജനങ്ങളോട് പരിഭ്രമിക്കേണ്ടതില്ലെന്ന് പറയുന്ന പ്രധാനമന്ത്രി യഥാർത്ഥത്തിൽ അദാനി, എപ്സ്റ്റീൻ കേസുകളിലെ വെളിപ്പെടുത്തലുകൾ ഓർത്ത് പരിഭ്രാന്തിയിലാണെന്ന് രാഹുൽ ഗാന്ധി പരിഹസിച്ചു. വാണിജ്യ സിലിണ്ടർ ക്ഷാമത്തിൽ പ്രതിഷേധിച്ച് പാർലമെന്റ് മന്ദിരത്തിൽ പ്രതിപക്ഷം നടത്തിയ പ്രതിഷേധത്തിന് പിന്നാലെ മാധ്യമങ്ങളോട് സംസാരിക്കുകയായിരുന്നു അദ്ദേഹം.
“പരിഭ്രമിക്കേണ്ട ആവശ്യമില്ലെന്നാണ് പ്രധാനമന്ത്രി ജനങ്ങളോട് പറയുന്നത്. എന്നാൽ തികച്ചും വ്യത്യസ്തമായ ചില കാരണങ്ങളാൽ അദ്ദേഹം തന്നെയാണ് ഇപ്പോൾ പരിഭ്രാന്തിയിൽ. എപ്സ്റ്റീൻ കേസിലെയും അദാനി കേസിലെയും കാര്യങ്ങൾ അദ്ദേഹത്തെ വേട്ടയാടുന്നു. അതുകൊണ്ടാണ് പ്രധാനമന്ത്രിക്ക് പാർലമെന്റിനകത്തേക്ക് വരാൻ കഴിയാത്തത്,” രാഹുൽ ഗാന്ധി ആരോപിച്ചു. ഇന്നലെ സഭയിൽ പ്രധാനമന്ത്രിയുടെ കസേര ഒഴിഞ്ഞു കിടക്കുകയായിരുന്നുവെന്നും അദ്ദേഹം ചൂണ്ടിക്കാട്ടി.
വാണിജ്യ സിലിണ്ടർ ക്ഷാമത്തിൽ പ്രതിഷേധിച്ച് കോൺഗ്രസ്, ഡി.എം.കെ, ടി.എം.സി തുടങ്ങിയ പാർട്ടികളിലെ വനിതാ എം.പിമാർ വിറകടുപ്പുകളുമായി പാർലമെന്റ് പരിസരത്ത് പ്രതിഷേധിച്ചു. പശ്ചിമേഷ്യയിലെ യുദ്ധസാഹചര്യം ഇന്ധന വിതരണത്തെ ബാധിച്ചിട്ടുണ്ടെന്നും സഭ നിർത്തിവെച്ച് ഇത് ചർച്ച ചെയ്യണമെന്നും പ്രതിപക്ഷം ആവശ്യപ്പെട്ടു. എന്നാൽ ചർച്ചയിൽ നിന്ന് സർക്കാർ ഒളിച്ചോടുകയാണെന്ന് ജയറാം രമേശും, ഇന്ധന സുരക്ഷ ഉറപ്പാക്കുന്നതിൽ സർക്കാർ പരാജയപ്പെട്ടുവെന്ന് മല്ലികാർജുൻ ഖാർഗെയും വിമർശിച്ചു.
നിലവിൽ രാജ്യത്തെ ഹോട്ടലുകളും വഴിയോര ഭക്ഷണശാലകളും എൽ.പി.ജി ക്ഷാമം കാരണം കടുത്ത പ്രതിസന്ധിയിലാണ്. പലരും വിറകടുപ്പുകളിലേക്കും ഇൻഡക്ഷൻ കുക്കറുകളിലേക്കും മാറേണ്ടി വരുന്നത് ചെറുകിട വ്യാപാരികളെ ദോഷകരമായി ബാധിക്കുന്നുണ്ട്. ഗാർഹിക സിലിണ്ടർ വിതരണം തടസ്സപ്പെടില്ലെന്ന് സർക്കാർ ഉറപ്പുനൽകുന്നുണ്ടെങ്കിലും വാണിജ്യ മേഖലയിലെ തടസ്സം ഭക്ഷണ സാധനങ്ങളുടെ വിലക്കയറ്റത്തിന് കാരണമാകുമെന്ന ആശങ്കയും ശക്തമാണ്.
