ഇന്ത്യൻ മൂല്യങ്ങൾക്കും സമകാലിക പ്രവർത്തന ആവശ്യങ്ങൾക്കും അനുസൃതമായി സൈനിക പാരമ്പര്യങ്ങളെ പുനർനിർമ്മിക്കുന്നതിനുള്ള ഒരു പ്രധാന ചുവടുവെപ്പായി, ഇന്ത്യൻ സൈന്യം പുതിയ സമഗ്രമായ ഡ്രസ് കോഡ് അവതരിപ്പിച്ചു. കൊളോണിയൽ കാലത്തെ പല ആചാരങ്ങളും ഒഴിവാക്കിക്കൊണ്ടാണ് രൂപഭാവം, ഗ്രൂമിംഗ്, ചടങ്ങുകളിലെ വസ്ത്രധാരണം എന്നിവയുമായി ബന്ധപ്പെട്ട മാനദണ്ഡങ്ങൾ സൈന്യം കർശനമാക്കിയത്.
‘ആർമി യൂണിഫോംസ്-2026’ (Army Uniforms-2026) മാനുവലിൽ വിശദീകരിച്ചിരിക്കുന്ന പുതിയ നിയന്ത്രണങ്ങൾ, കഴിഞ്ഞ ഒരു ദശകത്തിനിടയിലെ സൈനിക വസ്ത്രധാരണത്തിലും രൂപഭാവത്തിലും വരുത്തുന്ന ഏറ്റവും വലിയ പരിഷ്കരണത്തെയാണ് പ്രതിഫലിപ്പിക്കുന്നത്.
റെജിമെൻ്റൽ പാരമ്പര്യവും പ്രൊഫഷണൽ ധാർമ്മികതയും നിലനിർത്തിക്കൊണ്ടുതന്നെ, സൈന്യത്തിന്റെ തനതായ സ്വത്വം ശക്തിപ്പെടുത്തുന്നതിനുള്ള വിപുലമായ ശ്രമങ്ങളുടെ ഭാഗമായാണ് ഈ മാറ്റങ്ങളെന്ന് ആർമി ഉദ്യോഗസ്ഥർ വിശദീകരിക്കുന്നു.
