ടീം ഫൈനലിൽ എത്താതെ പുറത്തായെങ്കിലും ലോക ക്രിക്കറ്റ് ആരാധകരുടെ ഹൃദയം കീഴടക്കിയാണ് വൈഭവ് സൂര്യവംശി ഈ ഐ.പി.എൽ സീസണിൽ നിന്ന് മടങ്ങുന്നത്. 15-കാരനായ ഈ താരം 16 ഇന്നിങ്സുകളിൽ നിന്നായി 48.50 ശരാശരിയിൽ ഒരു സെഞ്ചുറിയും അഞ്ച് അർധസെഞ്ചുറികളും ഉൾപ്പെടെ 776 റൺസാണ് അടിച്ചുകൂട്ടിയത്. ക്വാളിഫയർ 2-ൽ ഗുജറാത്ത് ടൈറ്റൻസിനോട് പരാജയപ്പെട്ട മത്സരത്തിലും വൈഭവ് തന്റെ പോരാട്ടവീര്യം കാണിച്ച് അമ്പരപ്പെടുത്തിയിരുന്നു. ഈ മത്സരത്തിൽ വൈഭവ് 47 പന്തിൽ 96 റൺസ് നേടിയാണ് മികച്ച പ്രകടനം നടത്തിയത്.
നിലവിലെ സീസണിൽ വൈഭവ് സൂര്യവംശിയുടെയും രാജസ്ഥാൻ റോയൽസിന്റെയും യാത്ര അവസാനിച്ചെങ്കിലും, ഈ യുവ ബാറ്ററെ തേടി പുരസ്കാരങ്ങളുടെ പെരുമഴയാണ് എത്തുന്നത്. ഫൈനൽ ഞായറാഴ്ച അഹമ്മദാബാദിൽ നടക്കാനിരിക്കുകയാണ്. അതിന് ശേഷമുള്ള അവാർഡ് ദാന ചടങ്ങിൽ വൈഭവിന്റെ തിളക്കം കാണാനാകും. വൈഭവിന് ആകെ അഞ്ച് പുരസ്കാരങ്ങൾ വരെ ലഭിക്കാൻ സാധ്യതയുണ്ടെന്നാണ് വിലയിരുത്തൽ.
