തമിഴ്നാട് മുഖ്യമന്ത്രി ജോസഫ് വിജയ് തന്റെ സ്ഥിരം വേഷമായ കറുത്ത ബ്ലേസറിൽ നിന്ന് മാറി, പരമ്പരാഗത പട്ടുപഞ്ചയും ഷർട്ടുമണിഞ്ഞ് ചെന്നൈയിൽ തന്റെ മാനേജർ ജഗദീഷ് പളനിസാമിയുടെ ഗൃഹപ്രവേശന ചടങ്ങിൽ പങ്കെടുത്തു. തമിഴ്നാട് മുഖ്യമന്ത്രിയായി വിജയ് സത്യപ്രതിജ്ഞ ചെയ്തത് മുതൽ കറുത്ത ബ്ലേസറും വെള്ള ഷർട്ടും കറുത്ത പാന്റുമണിഞ്ഞാണ് പൊതുവേദികളിൽ പ്രത്യക്ഷപ്പെടാറുള്ളത്. എന്നാൽ, ഇന്ന് പരമ്പരാഗത വേഷത്തിൽ ചടങ്ങിനെത്തിയത് എല്ലാവരുടെയും ശ്രദ്ധ പിടിച്ചുപറ്റി.
ജഗദീഷിന്റെ പുതിയ വീട്ടിലേക്ക് വിജയ് പ്രവേശിക്കുന്നതിന്റെ വീഡിയോകൾ സോഷ്യൽ മീഡിയയിൽ പ്രചരിക്കുന്നുണ്ട്. വിജയ് വീട്ടിലേക്ക് കാലെടുത്തുവച്ചയുടനെ, ഉച്ചത്തിലുള്ള ആർപ്പുവിളിയും കരഘോഷവും അദ്ദേഹത്തെ സ്വീകരിച്ചു. ജഗദീഷിന്റെ കുടുംബത്തിലെ ഒരാൾ അദ്ദേഹത്തിന് വ്യക്തിപരമായ സ്വാഗതം നൽകുകയും ആലിംഗനം ചെയ്യുകയും ചെയ്തു.
