കൊച്ചി: പിണറായി സര്ക്കാരിന്റെ കാലത്ത് കഴിഞ്ഞ പത്തു വര്ഷമായി എറണാകുളം ജില്ലയോട് കാണിച്ചത് ചിറ്റമ്മ നയമെന്ന് കൊച്ചിയിലെ നിയുക്ത എംഎല്എ മുഹമ്മദ് ഷിയാസ്. യുഡിഎഫ് സര്ക്കാര് അധികാരം ഏറ്റെടുക്കുന്നതോടെ ജില്ലയില് അര്ഹമായ വികസനങ്ങള് വരുമെന്നും മുഖ്യമന്ത്രി മാത്രമല്ല, ജില്ലയില് നിന്നും മന്ത്രിമാരും ഉണ്ടാവുമെന്നും മുഹമ്മദ് ഷിയാസ് മാധ്യമങ്ങളോട് വ്യക്തമാക്കി.
അര്ഹമായ പ്രാതിനിധ്യം എറണാകുളം ജില്ലയില് നിന്നും മന്ത്രിസഭയില് ഉണ്ടാകും. മന്ത്രിസഭയില് മുറഖ്യമന്ത്രിയോടൊപ്പം പ്രവര്ത്തിക്കാന് യോഗ്യരായ നിരവധിയാളുകള് ജനപ്രതിനിധികളായി ജയിച്ചു വന്നിട്ടുണ്ട്. സ്വാഭാവികമായും അതില് നിന്നും മന്ത്രിസഭയിലേക്ക് പ്രവര്ത്തിക്കാന് കഴിയുന്ന ആളുകളെ പാര്ട്ടിയും നേതാക്കളും ചേര്ന്ന് തെരഞ്ഞെടുക്കും.
തുടര്ഭരണത്തിന് മുമ്പുള്ള കാലഘട്ടത്തിലും ജില്ലയില് വലിയ വികസന പ്രവര്ത്തനങ്ങള് നടക്കാത്ത ഒരു കാലഘട്ടമായിരുന്നു. കഴിഞ്ഞ പത്തു വര്ഷക്കാലം എറണാകുളം ജില്ലയ്ക്ക് പ്രത്യേകിച്ച് യാതൊരു തരത്തിലുള്ള നേട്ടങ്ങളും ഉണ്ടായിട്ടില്ല. അടിസ്ഥാന സൗകര്യ വികസനത്തിന്റെ കാര്യത്തിലായാലും വികസന പദ്ധതികളുടെ കാര്യത്തില് ആയാലും പിണറായി സര്ക്കാരിന്റെ ജില്ലയോട് ചിറ്റമ്മ നയമാണ് സ്വീകരിച്ചിരുന്നത്.
പ്രത്യേകിച്ചും യുഡിഎഫിന് കൂടുതല് ജനപ്രതിനിധികള് ഉള്ള ജില്ല ആയതിനാല് എറണാകുളത്തോട് അവഗണനയാണ് സിപിഎമ്മിന്റെ ഭാഗത്തു നിന്നും ഉണ്ടായത്. യുഡിഎഫിന്റെ ഭരണ സമയത്ത് എറണാകുളം ജില്ലയ്ക്ക് കാര്യമായ സംഭാവനകള്, വികസന പ്രവര്ത്തനങ്ങളിലും ക്ഷേമ പ്രവര്ത്തനങ്ങളിലും ഉണ്ടായിട്ടുള്ളത്.
ജില്ലയുടെ അടിസ്ഥാന സൗകര്യ വികസന പ്രവര്ത്തനങ്ങളിലെ പോരായ്മകള് നന്നായി അറിയാവുന്ന ഒരു മുഖ്യമന്ത്രി ഉള്ളതു കൊണ്ടും, ജില്ലയില് നിന്നും മന്ത്രിമാര് ഉണ്ടാവുന്നതു കൊണ്ടും ജില്ലയില് അടിസ്ഥാന വികസന പദ്ധതികളുടെ കാര്യത്തില് നല്ല സംഭാവന സര്ക്കാരില് നിന്നും ഉണ്ടാകും എന്ന് തന്നെയാണ് ഞങ്ങള് കരുതുന്നത് എന്ന് മുഹമ്മദ് ഷിയാസ് പറഞ്ഞു.
