സ്ത്രീകളുടെ മൊത്തത്തിലുള്ള ആരോഗ്യത്തിന്റെ സുപ്രധാന ഭാഗമാണ് ആർത്തവ ആരോഗ്യം. എന്നാൽ പലപ്പോഴും ആർത്തവ സംബന്ധമായ അസ്വസ്ഥതകൾ സാധാരണമാണെന്ന് കരുതി പല സ്ത്രീകളും അവഗണിക്കുകയാണ് പതിവ്. അമിതമായ വേദനയും ക്രമരഹിതമായ ആർത്തവചക്രവും routine ആയി കണ്ട് മാറ്റിവെക്കുന്നത് രോഗനിർണ്ണയവും ചികിത്സയും വൈകാൻ കാരണമാകുമെന്ന് ഡോക്ടർമാർ മുന്നറിയിപ്പ് നൽകുന്നു. മുംബൈ ഹോളി ഫാമിലി ഹോസ്പിറ്റലിലെ കൺസൾട്ടന്റ് ഒബ്സ്റ്റട്രീഷ്യനും ഗൈനക്കോളജിസ്റ്റുമായ ഡോ. മിഷേൽ വിക്ടർ ആണ് ആർത്തവ ആരോഗ്യത്തിൽ ശ്രദ്ധിക്കേണ്ട പ്രധാന കാര്യങ്ങളെക്കുറിച്ച് വ്യക്തമാക്കുന്നത്.
ആർത്തവസമയത്ത് ചെറിയ രീതിയിലുള്ള വയറുവേദന സാധാരണമാണ്. എന്നാൽ ദൈനംദിന പ്രവർത്തനങ്ങളെ ബാധിക്കുന്ന തരത്തിലുള്ള കഠിനമായ വേദനയോ, സാധാരണ വേദനസംഹാരികൾ കഴിച്ചിട്ടും കുറയാത്ത വേദനയോ ഉണ്ടെങ്കിൽ അത് ഗൗരവമായി കാണണം. എൻഡോമെട്രിയോസിസ് (Endometriosis) അല്ലെങ്കിൽ ഗർഭാശയ മുഴകൾ (Fibroids) പോലുള്ള പ്രശ്നങ്ങളുടെ സൂചനയാകാം ഇത്. ഇത്തരം ലക്ഷണങ്ങൾ അവഗണിക്കുന്നത് ഭാവിയിൽ സങ്കീർണ്ണതകൾക്ക് ഇടയാക്കും.
