കല്പറ്റ: കൽപറ്റ പഴയ ബസ് സ്റ്റാന്ഡില് നിന്ന് എംഡിഎംഎയുമായി യുവാവ് പിടിയിൽ. കോഴിക്കോട് താമരശേരി പൂനൂര് വേണാടിയില് വീട്ടില് വി. റാസിഖ് (38)ആണ് പിടിയിലായത്. ഇയാളിൽ നിന്ന് 40ഗ്രാം എംഡിഎംഎ പിടിച്ചെടുത്തു.
ചില്ലറ വിൽപനയ്ക്കായി എത്തിച്ച ലഹരി മരുന്നാണ് ജില്ലാ ലഹരിവിരുദ്ധ സ്ക്വാഡും കല്പറ്റ പോലീസും ചേര്ന്നാണ് പ്രതിയെ പിടികൂടിയത്. തിങ്കളാഴ്ച ഉച്ചയോടെ ആയിരുന്നു സംഭവം. നേരത്തെയും ലഹരി കേസുകളിൽ പ്രതിയാണ് പിടിയിലായ റാസിഖ്.
സിപ് ലോക്ക് കവറുകളില് മയക്കുമരുന്ന് നിറച്ചതിന് ശേഷം ഇരുകാലുകളിലും കെട്ടിവച്ചാണ് പ്രതി ലഹരി കടത്താൻ ശ്രമിച്ചത്. സംശയം തോന്നിയ പോലീസ് പ്രതിയെ പരിശോധനക്ക് വിധേയമാക്കുകയായിരുന്നു.
ഉയർന്ന അളവിലുള്ള ലഹരി കടത്തിന് പിന്നിൽ കൂടുതൽ പ്രതികളുണ്ടോയെന്ന സംശയത്തിലാണ് പോലീസ്. ഇതേ തുടർന്ന് സംഭവത്തിൽ വിശദമായ അന്വേഷണം ആരംഭിച്ചിട്ടുണ്ട്.



