കണ്ണൂർ: തെരഞ്ഞെടുപ്പുദിവസം കണ്ണൂർ മേഖലയിലുണ്ടായ സംഘർഷം തുടരുന്നു. ഇന്ന് പുലർച്ചെ പയ്യന്നൂരിലും മയ്യിലും അക്രമസംഭവങ്ങൾ അരങ്ങേറി. മയ്യിൽ കോൺഗ്രസ് ഓഫീസ് തകർത്തു.
പയ്യന്നൂരിൽ സിപിഎം പ്രവർത്തകന്റെ വീടാക്രമിച്ച അക്രമിസംഘം കാർ തകർത്ത് തീയിടുകയും ചെയ്തു. അക്രമസംഭവങ്ങളെ തുടർന്ന് മലപ്പട്ടം, മയ്യിൽ, പയ്യന്നൂർ മേഖലയിൽ പോലീസ് സേനയെ വിന്യസിച്ചിട്ടുണ്ട്.
മയ്യിലിൽ കോൺഗ്രസ് മണ്ഡലംകമ്മിറ്റി ഓഫീസ് ഒരുസംഘം അക്രമികൾ അടിച്ച് തകർത്തു. മയ്യിൽ ടൗണിലെ കോൺഗ്രസ് ഓഫീസായ ഗാന്ധിഭവനാണ് തകർത്തത്. ഇന്ന് പുലർച്ചെയാണ് അക്രമം. ഓഫീസിന്റെ മുൻവശത്തെയും പിന്നിലെയും ജനൽചില്ലുകൾ പൂർണമായും അടിച്ചുതകർത്ത അക്രമികൾ മീറ്റിംഗ് ഹാളിലെ ഫർണിച്ചറുകളും മൂന്ന് മേശയും 40 ഓളം കസേരകളും അടിച്ചുതകർത്തിട്ടുണ്ട്.
അക്രമത്തിനുപിന്നിൽ സിപിഎം പ്രവർത്തകരെന്ന് കോൺഗ്രസ് മയ്യിൽ മണ്ഡലം കമിറ്റി ആരോപിച്ചു.സംഭവമറിഞ്ഞ് മയ്യിൽ പോലീസ് സ്ഥലത്തെത്തി.
ഡിഡിസി സെക്രട്ടറി കെ.സി. ഗണേശൻ, മയ്യിൽ മണ്ഡലം പ്രസിഡന്റ് സി.എച്ച്. മൊയ്തീൻകുട്ടി, ബ്ലോക്ക് പ്രസിഡന്റ് കെ.പി. ശശിധരൻ, വൈസ് പ്രസിഡന്റ് ശ്രീജേഷ് കൊയിലേരിയൻ, ലോയേഴ്സ് കോൺഗ്രസ് ജില്ലാ പ്രസിഡന്റ് അഡ്വ. കെ.വി. മനോജ് കുമാർ, യുഡിഎഫ് കൺവീനർ പി.പി. സിദിഖ്, കെ. അജയകുമാർ എന്നിവർ അക്രമം നടന്ന ഓഫീസ് സന്ദർശിച്ചു. മയ്യിൽ മണ്ഡലം കമ്മിറ്റിയും യുഡിഎഫ് കമ്മിറ്റിയും സംഭവത്തിൽ പ്രതിഷേധിച്ചു.
ഇന്ന് വൈകുന്നേരം മയ്യിലിൽ പ്രതിഷേധം സംഘടിപ്പിച്ചിട്ടുണ്ട്. മയ്യിൽ മണ്ഡലം കമ്മിറ്റി ഓഫീസ് അടിച്ചുതകർത്തതിൽ കോൺഗ്രസ് കോറളായി ബൂത്ത് കമ്മറ്റി പ്രതിഷേധിച്ചു. ബൂത്ത് പ്രസിഡന്റ് ടി.നാസർ,കെ. നസീർ,ശ്രീജേഷ് കൊയിലേരിയൻ ,കെ.താജുദ്ദീൻ , പി.പി.മമ്മു,കെ.ശശിധരൻ എന്നിവർ പ്രതിഷേധത്തിൽ പങ്കെടുത്തു
