ഐഫോൺ ഉപയോക്താക്കൾ ഏറെ കാലമായി കാത്തിരുന്ന മൾട്ടിപ്പിൾ അക്കൗണ്ട് ഫീച്ചർ വാട്സാപ്പ് ഔദ്യോഗികമായി പുറത്തിറക്കി. പുതിയ അപ്ഡേറ്റ് എത്തുന്നതോടെ ഒരേ ആപ്പിൽ തന്നെ ഒന്നിലധികം വാട്സാപ്പ് അക്കൗണ്ടുകൾ ലോഗിൻ ചെയ്യാനും അവക്കിടയിൽ എളുപ്പത്തിൽ മാറാനും സാധിക്കും. നേരത്തെ ആൻഡ്രോയിഡ് ഫോണുകളിൽ മാത്രം ലഭ്യമായിരുന്ന ഈ സൗകര്യമാണ് ഇപ്പോൾ ഐഒഎസ് പ്ലാറ്റ്ഫോമിലേക്കും എത്തിയിരിക്കുന്നത്.
വ്യക്തിപരമായ ആവശ്യങ്ങൾക്കും ജോലിക്കുമായി രണ്ട് ഫോണുകൾ കൊണ്ടുനടക്കുന്നവർക്ക് ഈ നീക്കം വലിയ ആശ്വാസമാകും. വാട്സാപ്പ് സെറ്റിങ്സിലെ അക്കൗണ്ട് ലിസ്റ്റ് വഴി ഉപയോക്താക്കൾക്ക് പുതിയ അക്കൗണ്ടുകൾ ചേർക്കാൻ സാധിക്കും. ഓരോ അക്കൗണ്ടിനും പ്രത്യേക ചാറ്റ് ഹിസ്റ്ററി, നോട്ടിഫിക്കേഷൻ ക്രമീകരണങ്ങൾ, പ്രൈവസി സെറ്റിങ്സ് എന്നിവ ഉണ്ടായിരിക്കുമെന്നതാണ് ഇതിന്റെ പ്രത്യേകത.
വാട്സാപ്പ് ബിസിനസ് ആപ്പ് ഉപയോഗിക്കാതെ തന്നെ സാധാരണ ആപ്പിൽ തന്നെ രണ്ട് നമ്പറുകൾ പ്രവർത്തിപ്പിക്കാൻ ഇനി സാധിക്കും. ക്യുആർ കോഡ് സ്കാൻ ചെയ്തോ പുതിയ നമ്പർ രജിസ്റ്റർ ചെയ്തോ സെക്കൻഡറി അക്കൗണ്ട് ആഡ് ചെയ്യാം. സുരക്ഷയുടെ ഭാഗമായി ഓരോ അക്കൗണ്ടിനും ഫേസ് ഐഡി അല്ലെങ്കിൽ പാസ്കോഡ് ലോക്ക് ഏർപ്പെടുത്താനുള്ള സൗകര്യവും പുതിയ പതിപ്പിലുണ്ട്.
അക്കൗണ്ട് സ്വിച്ചിംഗിന് പുറമെ മറ്റ് ചില പ്രധാന അപ്ഡേറ്റുകളും വാട്സാപ്പ് അവതരിപ്പിച്ചിട്ടുണ്ട്. സ്റ്റോറേജ് മാനേജ്മെന്റ് ടൂളിലെ മാറ്റമാണ് ഇതിൽ പ്രധാനം. ഫോണിലെ വലിയ ഫയലുകൾ കണ്ടെത്തി നീക്കം ചെയ്യാനും ചാറ്റുകൾ ഡിലീറ്റ് ചെയ്യാതെ തന്നെ സ്ഥലം ലാഭിക്കാനും പുതിയ ടൂൾ സഹായിക്കും.
ഐഒഎസിൽ നിന്ന് ആൻഡ്രോയിഡിലേക്ക് ചാറ്റുകൾ കൈമാറുന്ന പ്രക്രിയ കൂടുതൽ ലളിതമാക്കിയിട്ടുണ്ട്. ഫോട്ടോകൾ എഡിറ്റ് ചെയ്യാൻ മെറ്റാ എഐയുടെ സഹായവും ഇനി ലഭ്യമാകും. ചിത്രങ്ങളിലെ ബാക്ക്ഗ്രൗണ്ട് മാറ്റാനും ആവശ്യമില്ലാത്ത ഭാഗങ്ങൾ നീക്കം ചെയ്യാനും ഈ എഐ ഫീച്ചർ ഉപയോക്താക്കളെ സഹായിക്കും.
മെസേജുകൾക്ക് മറുപടി നൽകാൻ എഐ നിർദ്ദേശങ്ങൾ നൽകുന്ന ‘റൈറ്റിംഗ് ഹെൽപ്പ്’ ഫീച്ചറും ഇതിനോടൊപ്പം പുറത്തിറക്കിയിട്ടുണ്ട്. ചാറ്റുകളുടെ സ്വകാര്യത നിലനിർത്തിക്കൊണ്ട് തന്നെ മികച്ച മറുപടികൾ തയ്യാറാക്കാൻ ഇത് സഹായിക്കും. വരും ദിവസങ്ങളിൽ ഘട്ടം ഘട്ടമായി എല്ലാ ഐഫോൺ ഉപയോക്താക്കളിലേക്കും ഈ അപ്ഡേറ്റ് എത്തും.
