രാജ്യത്തിൻ്റെ മറ്റ് ഭാഗങ്ങൾ ഒരു ദിവസം കൂടി കാത്തിരിക്കുമ്പോൾ കേരളം ഇന്ന് ചെറിയ പെരുന്നാൾ (ഈദ്-ഉൽ-ഫിത്തർ) ആഘോഷിക്കുന്നു. റമദാൻ വ്രതാനുഷ്ഠാനത്തിന്റെ അവസാനവും ശവ്വാൽ മാസത്തിന്റെ തുടക്കവും കുറിക്കുന്ന മാസപ്പിറവി ദൃശ്യമായതിലെ വ്യത്യാസമാണ് ഈ തീയതി മാറ്റത്തിന് കാരണം. കേരളത്തിലെ തീരപ്രദേശങ്ങളിൽ വ്യാഴാഴ്ച വൈകിട്ട് ശവ്വാൽ മാസപ്പിറവി ദൃശ്യമായതായി മതനേതാക്കൾ സ്ഥിരീകരിച്ചിരുന്നു. ഇതിന്റെ അടിസ്ഥാനത്തിൽ വെള്ളിയാഴ്ച ശവ്വാൽ ഒന്നായും ചെറിയ പെരുന്നാളായും പ്രഖ്യാപിക്കുകയായിരുന്നു.
കേരളത്തിന് വിപരീതമായി ഡൽഹി ഉൾപ്പെടെയുള്ള ഉത്തരേന്ത്യൻ സംസ്ഥാനങ്ങളിൽ വ്യാഴാഴ്ച മാസപ്പിറവി ദൃശ്യമായതായി റിപ്പോർട്ടുകളില്ല. ഇതിനാൽ ഈ പ്രദേശങ്ങളിൽ വെള്ളിയാഴ്ച റമദാനിലെ മുപ്പതാം നോമ്പായിരിക്കും. ശനിയാഴ്ചയായിരിക്കും ഈ സംസ്ഥാനങ്ങളിൽ പെരുന്നാൾ ആഘോഷിക്കുന്നത്. മിക്കവാറും എല്ലാ മേഖലകളിലും ഇത്തവണ 30 നോമ്പുകൾ പൂർത്തിയാക്കിയ ശേഷമാണ് വിശ്വാസികൾ പെരുന്നാളിലേക്ക് കടക്കുന്നത്.
