ഈ വർഷത്തെ ഈദുൽ ഫിത്വർ ഇന്ത്യയിലും സൗദി അറേബ്യയിലും വ്യത്യസ്ത ദിനങ്ങളിലാവാനാണ് സാധ്യത. സൗദി അറേബ്യയിൽ ബുധനാഴ്ട മാസപ്പിറവി കാണാത്തിനെ തുടർന്ന് മാർച്ച് 20ന് പെരുന്നാളായി പ്രഖ്യാപിച്ചിരുന്നു. എന്നാൽ ഇന്ത്യയിൽ വ്യാഴാഴ്ചയാണ് മാസപ്പിറവി നിരീക്ഷണം നടക്കുക. ഇന്ന് മാസപ്പിറവി കണ്ടാൽ നാളെയായിരിക്കും പെരുന്നാൾ, കണ്ടില്ലെങ്കിൽ ശനിയാഴ്ച.
ഈ സമയവ്യത്യാസം കാരണം പലപ്പോഴും ഇരു രാജ്യങ്ങളിലും രണ്ടു ദിവസങ്ങളിലായാണ് പെരുന്നാൾ ആഘോഷിക്കാറുള്ളത്. ഇത് യാദൃശ്ചികമല്ല, മറിച്ച് ശാസ്ത്രം, ഭൂമിശാസ്ത്രപരമായ സ്ഥാനം, ചന്ദ്രദർശനം സ്ഥിരീകരിക്കുന്ന രീതി എന്നിവയെല്ലാം ഇതിന് പിന്നിലുണ്ട്. ചില വർഷങ്ങളിൽ രണ്ടു രാജ്യങ്ങളിലും ഒരേ ദിവസം പെരുന്നാൾ വരാറുണ്ടെങ്കിലും ഈ വർഷം മാറ്റമുണ്ടാകാനാണ് സാധ്യത.
ഈദ് ചന്ദ്രദർശന വ്യത്യാസത്തിന് പിന്നിലെ പ്രധാന കാരണങ്ങളിലൊന്ന് ഇന്ത്യയുടെയും സൗദി അറേബ്യയുടെയും ഭൂമിശാസ്ത്രപരമായ സ്ഥാനമാണ്. സൗദി അറേബ്യ ഇന്ത്യയുടെ പടിഞ്ഞാറ് ഭാഗത്താണ് സ്ഥിതി ചെയ്യുന്നത്. ഇതിനർത്ഥം ചന്ദ്രന്റെ സ്ഥാനവുമായി താരതമ്യപ്പെടുത്തുമ്പോൾ സൂര്യാസ്തമയം വൈകിയാണ് നടക്കുന്നത് എന്നാണ്. ഇത് മാസപ്പിറവി ദൃശ്യമാകാൻ ചന്ദ്രന് കൂടുതൽ സമയം നൽകുന്നു. ലളിതമായി പറഞ്ഞാൽ, സൂര്യാസ്തമയ സമയത്ത് ഇന്ത്യയെ അപേക്ഷിച്ച് സൗദിയിലെ ആകാശത്ത് ചന്ദ്രൻ അൽപം കൂടി ഉയർന്ന നിലയിലും തെളിച്ചമുള്ളതായും കാണപ്പെടും. ഈ ചെറിയ സമയവ്യത്യാസമാണ് മാസപ്പിറവി ദൃശ്യമാകുന്നതിൽ വലിയ മാറ്റമുണ്ടാക്കുന്നത്.
പ്രാദേശിക ചന്ദ്ര ദർശനവും ആഗോള ദർശനവും
മറ്റൊരു പ്രധാന ഘടകം എങ്ങനെ സ്ഥിരീകരിക്കുന്നു എന്നതാണ്. ഇന്ത്യയിൽ പ്രാദേശിക കമ്മിറ്റികൾ നേരിട്ട് ചന്ദ്രനെ കാണുന്നതിനെയാണ് പ്രധാനമായും ആശ്രയിക്കുന്നത്. ആകാശം മേഘാവൃതമാണെങ്കിലോ മാസപ്പിറവി വളരെ മങ്ങിയതാണെങ്കിലോ ദർശനം സ്ഥിരീകരിക്കപ്പെടില്ല. ഇന്ത്യയിലെ ചുരുക്കം ചില വിഭാഗങ്ങൾ സൗദിയിലെ പ്രഖ്യാപനങ്ങൾ പിന്തുടരാറുണ്ടെങ്കിലും ഭൂരിഭാഗം പേരും പ്രാദേശിക സ്ഥിരീകരണത്തിനാണ് മുൻഗണന നൽകാറുള്ളത്.
ജ്യോതിശാസ്ത്രപരമായ സാഹചര്യങ്ങൾ
ജ്യോതിശാസ്ത്രവും ഇതിൽ വലിയ പങ്ക് വഹിക്കുന്നുണ്ട്. ചന്ദ്രന്റെ സ്ഥാനം, തെളിച്ചം, കോണളവ് എന്നിവ സ്ഥലത്തിനനുസരിച്ച് വ്യത്യാസപ്പെട്ടിരിക്കും. സൗദി അറേബ്യയിൽ, വ്യക്തമായ കാലാവസ്ഥയും ചന്ദ്രന്റെ അനുകൂല സ്ഥാനവും കാരണം മാസപ്പിറവി എളുപ്പത്തിൽ ദൃശ്യമായേക്കാം. ഇന്ത്യ കിഴക്ക് ഭാഗത്ത് സ്ഥിതി ചെയ്യുന്നതിനാൽ സൂര്യാസ്തമയ സമയത്ത് ചന്ദ്രൻ ചക്രവാളത്തിന് താഴെയായിരിക്കും കാണപ്പെടുക. ഇത് ചന്ദ്രന്റെ തെളിച്ചം കുറയ്ക്കുകയും നഗ്നനേത്രങ്ങൾ കൊണ്ട് കാണുന്നത് പ്രയാസകരവുമാക്കുന്നു.
എന്തു കൊണ്ട് ഓരോ വർഷവും തീയതി മാറുന്നു?
ഇസ്ലാമിക് കലണ്ടർ ചന്ദ്രചക്രത്തെ അടിസ്ഥാനമാക്കിയുള്ളതാണ്. ഇത് സൗരവർഷത്തേക്കാൾ ഏകദേശം 11 ദിവസം കുറവാണ്. അതുകൊണ്ടാണ് ഓരോ വർഷവും പെരുന്നാൾ നേരത്തെ വരുന്നത്. ഇതുകാരണം ഇന്ത്യയും സൗദി അറേബ്യയും പോലുള്ള രാജ്യങ്ങൾ തമ്മിൽ പെരുന്നാൾ തീയതികളിൽ വ്യത്യാസമുണ്ടാകുന്നത് തികച്ചും സ്വാഭാവികമാണ്. ചിലപ്പോൾ ഇന്ത്യയിലെ മറ്റു രാജ്യങ്ങളിൽ നിന്ന് വ്യത്യസ്തമായി കേരളത്തിൽ സൗദി അറേബ്യയ്ക്കൊപ്പം പെരുന്നാൾ ആഘോഷിക്കാറുണ്ട്. തീരദേശ മേഖലയായതിനാൽ ചന്ദ്രൻ ദൃശ്യമാകാനുള്ള സാധ്യതയും ഗൾഫ് രാജ്യങ്ങളിലെ പ്രഖ്യാപനങ്ങൾ പിന്തുടരുന്ന രീതിയും ഇതിന് കാരണമാകുന്നുണ്ട്.
