മിഡിൽ ഈസ്റ്റിലെ പ്രതിസന്ധി രൂക്ഷമാകുന്നതിനിടെ അമേരിക്കയെ ആശങ്കയിലാഴ്ത്തി നിഗൂഢ ഡ്രോണുകൾ കണ്ടെത്തി. വ്യാഴാഴ്ച വാഷിംഗ്ടണിലെ ഫോർട്ട് മക്നയർ എന്ന സൈനിക താവളത്തിന് മുകളിലാണ് ദുരൂഹമായ നിലയിൽ ഡ്രോണുകൾ കണ്ടെത്തിയത്. അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോയുടെയും പ്രതിരോധ സെക്രട്ടറി പീറ്റ് ഹെഗ്സെത്തിന്റെയും വസതികളാണ് ഈ താവളത്തിലുള്ളത്. ഡ്രോണുകൾ എവിടെ നിന്നാണ് വന്നതെന്ന് ഉദ്യോഗസ്ഥർ ഇതുവരെ കണ്ടെത്തിയിട്ടില്ല.
വാഷിംഗ്ടൺ പോസ്റ്റിന്റെ റിപ്പോർട്ട് അനുസരിച്ച്, ഡ്രോണുകൾ കണ്ടെത്തിയതിനെ തുടർന്ന് റൂബിയോയെയും ഹെഗ്സെത്തിനെയും സുരക്ഷിത സ്ഥാനങ്ങളിലേക്ക് മാറ്റുന്നതുമായി ബന്ധപ്പെട്ടുള്ള ആലോചനകൾ ആരംഭിച്ചിട്ടുണ്ട്. എന്നാൽ ഇരുവരെയും മാറ്റിയോ എന്ന കാര്യത്തിൽ വ്യക്തതയില്ല. പെന്റഗണും യു.എസ് സ്റ്റേറ്റ് ഡിപ്പാർട്ട്മെന്റും ഇതിനോട് ഇതുവരെ പ്രതികരിച്ചിട്ടില്ല. സുരക്ഷാ കാരണങ്ങൾ ചൂണ്ടിക്കാട്ടി പെന്റഗൺ വക്താവ് സീൻ പാർനെൽ ഈ വിഷയത്തിൽ സംസാരിക്കാൻ തയ്യാറായില്ല.
സുരക്ഷാ കാരണങ്ങളാൽ സെക്രട്ടറിയുടെ നീക്കങ്ങളെ കുറിച്ച് വകുപ്പിന് അഭിപ്രായം പറയാൻ കഴിയില്ലെന്നും അത്തരം നീക്കങ്ങളെ കുറിച്ച് റിപ്പോർട്ട് ചെയ്യുന്നത് തികച്ചും നിരുത്തരവാദപരമാണെന്നും അദ്ദേഹം വാഷിംഗ്ടൺ പോസ്റ്റിനോട് പറഞ്ഞു.
