ചേർപ്പ്: തെരുവുനായയുടെ ആക്രമണത്തെതുടർന്ന് അസ്വസ്ഥത അനുഭവപ്പെട്ട സെക്യൂരിറ്റി ജീവനക്കാരൻ മരിച്ചു. ചേനം പുതുപ്പുള്ളി പരേതനായ കൊച്ചക്കന്റെ മകൻ ദേവദാസ് (67) ആണ് മരിച്ചത്.
അമ്മാടം സർവീസ് സഹകരണ ബാങ്ക് ചേനം ബ്രാഞ്ചിലെ സെക്യൂരിറ്റി ജീവനക്കാരനായ ഇദ്ദേഹത്തെ തിങ്കളാഴ്ച രാത്രി ജോലിക്കിടയിൽ ഭക്ഷണം കഴിക്കാൻ പോകുന്നതിനിടെ ചേനം ക്ഷീരസംഘം പാൽ സൊസൈറ്റിക്കു മുന്നിൽ തെരുവുനായ ഓടിച്ചിരുന്നു. ആക്രമണത്തിൽനിന്ന് രക്ഷപ്പെടാൻ ശ്രമിക്കുന്നതിനിടെ വീഴുകയും ചെയ്തു.
പിന്നീട് വീട്ടിലെത്തിയശേഷമാണ് അസ്വസ്ഥത അനുഭവപ്പെട്ടത്. ചേർപ്പിലെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി.
അമ്മ: പരേതയായ ജാനകി. സഹോദരങ്ങൾ: പരേതനായ ധർമദാസൻ, സോമൻ, സനാതനൻ, അജയഘോഷ്, പരേതയായ ലീല, വസുമതി, പത്മാവതി, പ്രേമലത.
