ലണ്ടനിൽ കത്തോലിക്കാ വിശ്വാസം സ്വീകരിക്കുന്നവരുടെ എണ്ണത്തിൽ റെക്കോർഡ് വർധനവ്. ഈസ്റ്റർ ദിനത്തിൽ ലണ്ടനിലെ വിവിധ രൂപതകളിലായി നൂറുകണക്കിന് ആളുകളാണ് കത്തോലിക്കാ സഭയിലേക്ക് ഔദ്യോഗികമായി പ്രവേശിക്കുന്നത്. കഴിഞ്ഞ 15 വർഷത്തിനിടയിലെ ഏറ്റവും ഉയർന്ന നിരക്കാണിതെന്ന് വത്തിക്കാൻ വാർത്താ ഏജൻസി റിപ്പോർട്ട് ചെയ്യുന്നു.
ലണ്ടനിലെ വെസ്റ്റ്മിൻസ്റ്റർ, സൗത്ത്വാർക്ക് രൂപതകളിലാണ് ഏറ്റവും കൂടുതൽ ആളുകൾ സഭയിലേക്ക് വരുന്നത്. വെസ്റ്റ്മിൻസ്റ്റർ രൂപതയിൽ മാത്രം ഏകദേശം 800 പേർ ഈസ്റ്റർ ദിനത്തിൽ മാമ്മോദീസ സ്വീകരിക്കാനോ, സഭയിൽ പൂർണ്ണമായി ചേരാനോ തയ്യാറെടുക്കുന്നു. ഇത് കഴിഞ്ഞ വർഷത്തെ അപേക്ഷിച്ച് 60% കൂടുതലാണ്. സഭയിലേക്ക് കടന്നുവരുന്നവരിൽ പകുതിയോളം പേർ 35 വയസ്സിൽ താഴെയുള്ളവരാണെന്നത് ശ്രദ്ധേയമാണ്. ഇതിൽ 20% പേർ 18 നും 25 നുമിടയിൽ പ്രായമുള്ളവരാണ്. ആധുനിക കാലത്തെ ആത്മീയവരൾച്ചയ്ക്കിടയിൽ യുവാക്കൾ കത്തോലിക്കാ വിശ്വാസത്തിൽ അഭയം തേടുന്നത് വലിയ മാറ്റമായി വിലയിരുത്തപ്പെടുന്നു.
80 വയസ്സിനു മുകളിൽ പ്രായമുള്ളവരും ഇത്തവണ വിശ്വാസം സ്വീകരിക്കുന്നവരിൽ ഉൾപ്പെടുന്നു. 81 വയസ്സുള്ള ഒരു കാറ്റക്കുമനും (Catechumen) 88 വയസ്സുള്ള ഒരു കാൻഡിഡേറ്റും ഇതിൽ ഉൾപ്പെടുന്നു. ഇത് വിശ്വാസം സ്വീകരിക്കുന്നതിന് പ്രായം ഒരു തടസ്സമല്ലെന്ന് കാണിക്കുന്നു.
“മുഴുവൻ സഭയും സന്തോഷിക്കുന്നു” എന്നാണ് ഈ വാർത്തയോട് വെസ്റ്റ്മിൻസ്റ്റർ രൂപത പ്രതികരിച്ചത്. കോവിഡ് കാലഘട്ടത്തിനു ശേഷം വിശ്വാസികളുടെ എണ്ണത്തിലുണ്ടായ ഈ വലിയ വർധനവ് ബ്രിട്ടനിലെ സഭയുടെ പുനരുജ്ജീവനത്തിന്റെ അടയാളമായി കരുതപ്പെടുന്നു. ലണ്ടനിലെ ഈ ആത്മീയ ഉണർവ് യൂറോപ്പിലെ മറ്റ് രാജ്യങ്ങളിലെ സഭകൾക്കും വലിയ പ്രത്യാശ നൽകുന്നതാണെന്ന് റിപ്പോർട്ടുകൾ ചൂണ്ടിക്കാട്ടുന്നു.
