ഈ ആഴ്ച ഇന്ത്യയിൽ വിപുലമായ ഉൽപ്പന്ന നിര അവതരിപ്പിച്ച് ആപ്പിൾ വിപണിയെ ഞെട്ടിച്ചിരിക്കുകയാണ്. പുതിയ ഐഫോണുകൾ, പരിഷ്കരിച്ച ഐപാഡുകൾ, വിവിധ മാക്ബുക്ക് മോഡലുകൾ, കരുത്തുറ്റ പ്രോസസറുകൾ, ഡിസ്പ്ലേകൾ എന്നിവയുൾപ്പെടെ വലിയൊരു നിരയാണ് കമ്പനി പുറത്തിറക്കിയത്. പ്രൊഫഷണലുകൾക്കായുള്ള ഹൈ-പെർഫോമൻസ് ലാപ്ടോപ്പുകൾ മുതൽ വിദ്യാർത്ഥികൾക്കായി കുറഞ്ഞ വിലയിലുള്ള മാക്ബുക്ക് വരെ ഇതിലുണ്ട്.
ആപ്പിളിന്റെ വില കുറഞ്ഞ ഐഫോൺ നിരയിലേക്കാണ് ഐഫോൺ 17e (iPhone 17e) എത്തുന്നത്. 64,900 രൂപ മുതൽ വില ആരംഭിക്കുന്ന ഫോണിന്റെ വിൽപ്പന മാർച്ച് 11 മുതൽ ആരംഭിക്കും. വില കുറഞ്ഞ മോഡലാണെങ്കിലും ഐഫോൺ 17-ൽ ഉപയോഗിക്കുന്ന അതേ എ19 (A19) ചിപ്പാണ് ഇതിലും നൽകിയിരിക്കുന്നത്. 256 ജിബി സ്റ്റോറേജിൽ ആരംഭിക്കുന്ന ഫോണിൽ മാഗ്സേഫ്, ക്യുഐ2 വയർലെസ് ചാർജിംഗ് പിന്തുണയുമുണ്ട്. 48 മെഗാപിക്സൽ മെയിൻ ക്യാമറയും വേഗതയേറിയ സി1എക്സ് (C1X) സെല്ലുലാർ മോഡവുമാണ് ഇതിന്റെ മറ്റ് പ്രത്യേകതകൾ.
