എൻജിൻ തകരാറിനെത്തുടർന്ന് 150 യാത്രക്കാരുമായി ലേയിലേക്ക് പറന്ന സ്പൈസ് ജെറ്റ് വിമാനം ദില്ലി ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ അടിയന്തരമായി തിരിച്ചിറക്കി. ഫെബ്രുവരി 24-ന് രാവിലെ 6:08-ന് ദില്ലിയിൽ നിന്ന് പുറപ്പെട്ട എസ്.ജി 121 (ബോയിംഗ് 737) വിമാനമാണ് സാങ്കേതിക തകരാറിനെത്തുടർന്ന് ഒരു മണിക്കൂറിനുള്ളിൽ മടങ്ങിയെത്തിയത്. വിമാനത്തിന് തകരാർ സംഭവിച്ച ഉടൻ തന്നെ പൈലറ്റ് ‘മെയ്ഡേ’ (Mayday) സന്ദേശം നൽകി അടിയന്തര ലാൻഡിംഗിന് അനുമതി തേടുകയായിരുന്നു.
പൈലറ്റിന്റെ ജാഗ്രതാ നിർദ്ദേശത്തെത്തുടർന്ന് വിമാനത്താവളത്തിൽ അതീവ ജാഗ്രത പ്രഖ്യാപിക്കുകയും അടിയന്തര ലാൻഡിംഗിനുള്ള എല്ലാ സുരക്ഷാ ക്രമീകരണങ്ങളും അധികൃതർ ഒരുക്കുകയും ചെയ്തു. രാവിലെ 6:49-ഓടെ വിമാനം സുരക്ഷിതമായി റൺവേയിലിറങ്ങി. യാത്രക്കാരെയെല്ലാം സുരക്ഷിതമായി പുറത്തെത്തിച്ചുവെന്നും ആർക്കും പരിക്കുകളില്ലെന്നും സ്പൈസ് ജെറ്റ് വക്താവ് അറിയിച്ചു. കോക്ക്പിറ്റിൽ തീപിടുത്ത മുന്നറിയിപ്പുകൾ (Fire Warning) ഒന്നും ഉണ്ടായിരുന്നില്ലെന്നും സാങ്കേതിക തകരാർ മാത്രമാണ് റിപ്പോർട്ട് ചെയ്തതെന്നും കമ്പനി വ്യക്തമാക്കി.
