തമിഴ്നാട് നിയമസഭാ തിരഞ്ഞെടുപ്പിന് മുന്നോടിയായി ഭരണകക്ഷിയായ ഡിഎംകെയും സഖ്യകക്ഷിയായ കോൺഗ്രസും തമ്മിലുള്ള സീറ്റ് വിഭജന ചർച്ചകൾ വഴിമുട്ടി നിൽക്കുന്നു. വരാനിരിക്കുന്ന തിരഞ്ഞെടുപ്പിൽ 45 സീറ്റുകൾ വേണമെന്നാണ് കോൺഗ്രസ് ഔദ്യോഗികമായി ആവശ്യപ്പെട്ടിരിക്കുന്നത്.
2021-ലെ തിരഞ്ഞെടുപ്പ് പ്രകടനം വിലയിരുത്തിയാണ് കോൺഗ്രസ് ഈ ആവശ്യം ഉന്നയിച്ചിരിക്കുന്നത്. എന്നാൽ ഡിഎംകെ ഇതിനോട് അനുകൂലമായി പ്രതികരിച്ചിട്ടില്ലെന്ന് അടുത്ത വൃത്തങ്ങൾ സൂചിപ്പിക്കുന്നു.
തിങ്കളാഴ്ച രാത്രി കോൺഗ്രസ് ജനറൽ സെക്രട്ടറി കെ സി വേണുഗോപാൽ, മുതിർന്ന നേതാവ് ടി എസ് സിംഗ് ദിയോ എന്നിവർ തമിഴ്നാട് മുഖ്യമന്ത്രിയും ഡിഎംകെ അധ്യക്ഷനുമായ എം കെ സ്റ്റാലിനുമായി നടത്തിയ കൂടിക്കാഴ്ചയിലും അന്തിമ ധാരണയിലെത്താൻ സാധിച്ചില്ല. 2021-ലെ നിയമസഭാ തിരഞ്ഞെടുപ്പിൽ 25 സീറ്റുകളിലാണ് കോൺഗ്രസ് മത്സരിച്ചിരുന്നത്. ഇത്തവണ അത് വലിയ തോതിൽ വർദ്ധിപ്പിക്കണമെന്നാണ് പാർട്ടി നേതൃത്വത്തിന്റെ നിലപാട്.
