ന്യൂഡൽഹി: രാജ്യതലസ്ഥാനത്തു ഭീകരാക്രമണം ഉണ്ടായേക്കുമെന്ന രഹസ്യാന്വേഷണ റിപ്പോർട്ടിനു പിന്നാലെ ഡൽഹിയിലെ കേരള ഹൗസിന് ബോംബ് ഭീഷണി. ഗവർണർ രാജേന്ദ്ര അർലേക്കർ ഡൽഹി സന്ദർശിക്കാനിരിക്കേയാണു റെസിഡന്റ് കമ്മീഷണർക്ക് അജ്ഞാത ഭീഷണിസന്ദേശം ലഭിച്ചത്.
ബോംബ് ഉടൻ പൊട്ടുമെന്നായിരുന്നു സന്ദേശം. തുടർന്ന് കേരള ഹൗസ് അധികൃതർ പോലീസിൽ വിവരമറിയിച്ചു. ബോംബ് സ്ക്വാഡ് അടക്കമെത്തി വ്യാപക പരിശോധന നടത്തിയെങ്കിലും സംശയാസ്പദമായി ഒന്നും കണ്ടെത്താനായില്ല. ഡൽഹിയിലാകെ സുരക്ഷാമുന്നറിയിപ്പ് നിലനിൽക്കുന്ന പശ്ചാത്തലത്തിലാണ് കേരള ഹൗസിനും ഭീഷണിസന്ദേശം എത്തുന്നത്.
