കേരളത്തിലെ കത്തോലിക്കാ സഭയ്ക്ക് ആത്മീയ സന്തോഷം പകർന്ന്, കപ്പൂച്ചിൻ സന്യാസിയായ ഫാ. തെയോഫാനെ ലെയോ പതിനാലാമൻ മാർപാപ്പ ധന്യൻ പദവിയിലേക്കുയർത്തി. വിശുദ്ധ പദവിയിലേക്കുള്ള നാമകരണ നടപടികളിലെ പ്രധാന ഘട്ടമാണിത്. ഫാ. തെയോഫാന്റെ വീരോചിതമായ പുണ്യങ്ങൾ അംഗീകരിച്ചുകൊണ്ടുള്ള ഉത്തരവിൽ മാർപാപ്പ ഒപ്പുവെച്ചു.
1913 ജൂലൈ 20-ന് കേരളത്തിലെ കോട്ടപ്പുറത്താണ് ഫാ. തെയോഫാൻ ജനിച്ചത്. മൈക്കിൾ എന്നായിരുന്നു പേര്. വിശ്വാസ തീക്ഷണതയുള്ള കുടുംബത്തിൽ വളർന്ന അദ്ദേഹം 1929-ൽ വരാപ്പുഴ അതിരൂപതയുടെ സെമിനാരിയിൽ ചേർന്നു. പിന്നീട് വിശുദ്ധ ഫ്രാൻസിസ് അസീസിയുടെ ആത്മീയതയിൽ ആകൃഷ്ടനായി കപ്പൂച്ചിൻ സഭയിൽ ചേരുകയും 1933-ൽ ‘തെയോഫാൻ’ എന്ന പേര് സ്വീകരിക്കുകയും ചെയ്തു.
1941-ൽ വൈദികനായി അഭിഷിക്തനായ അദ്ദേഹം ധ്യാനഗുരുവായും കപ്പൂച്ചിൻ സെമിനാരികളുടെ ചുമതലക്കാരനായും സേവനമനുഷ്ഠിച്ചു. കുന്നം സേക്രഡ് ഹാർട്ട് കോൺവെന്റ്, തിരുച്ചിറപ്പള്ളി, കോത്തഗിരി എന്നിവിടങ്ങളിലെ ശുശ്രൂഷകൾ അദ്ദേഹത്തെ ജനപ്രിയനാക്കി. പൊന്നുരുന്നിയിൽ വിശുദ്ധ ബോണവഞ്ചറിന്റെ നാമത്തിൽ കോൺവെന്റും സെമിനാരിയും പള്ളിയും സ്ഥാപിക്കുന്നതിൽ അദ്ദേഹം മുഖ്യപങ്ക് വഹിച്ചു.
തന്റെ അടുത്തെത്തുന്ന പാവപ്പെട്ടവരോടും കഷ്ടപ്പെടുന്നവരോടും അദ്ദേഹം കാണിച്ചിരുന്ന സ്നേഹവും ലാളിത്യവും കാരണം പലരും അദ്ദേഹത്തെ ‘ഭാരതത്തിന്റെ പാദ്രെ പിയോ’ എന്നാണ് വിളിച്ചിരുന്നത്. അസാധാരണമായ പ്രസംഗപാടവവും പ്രാർത്ഥനാ ചൈതന്യവും അദ്ദേഹത്തിന് വലിയൊരു അനുയായി വൃന്ദത്തെ നേടിക്കൊടുത്തു.
1968 ഏപ്രിൽ നാലിന് എറണാകുളത്ത് വെച്ചാണ് അദ്ദേഹം മരണമടഞ്ഞത്. മരണശേഷവും അദ്ദേഹത്തിന്റെ കബറിടത്തിലേക്ക് ആയിരക്കണക്കിന് തീർത്ഥാടകർ എത്താറുണ്ട്. ഫാ. തെയോഫാന്റെ വിശുദ്ധ ജീവിതത്തെ വത്തിക്കാൻ ഔദ്യോഗികമായി അംഗീകരിച്ചതോടെ, കേരളത്തിലെയും പ്രത്യേകിച്ച് കൊച്ചിയിലെയും വിശ്വാസികൾ വലിയ ആവേശത്തിലാണ്. അദ്ദേഹത്തിന്റെ മധ്യസ്ഥതയിലുള്ള ഒരു അത്ഭുതം കൂടി അംഗീകരിക്കപ്പെട്ടാൽ തെയോഫാൻ അച്ചൻ വാഴ്ത്തപ്പെട്ടവരുടെ നിരയിലേക്ക് ഉയർത്തപ്പെടും.
