ബിഹാറിലെ ഭോജ്പൂരിൽ സ്റ്റേജ് ഷോയ്ക്കിടെ നർത്തകിക്കെതിരെ കാണികളുടെ ക്രൂരത. നൃത്തം ചെയ്യുന്നതിനിടെ യുവതിയുടെ വായിൽ നിർബന്ധിച്ച് നാണയങ്ങൾ തിരുകിയതിനെ തുടർന്ന് നില ഗുരുതരമായതോടെ ആശുപത്രിയിൽ പ്രവേശിപ്പിച്ചു. പൊതു പരിപാടികളിൽ വനിതാ ഡാൻസർമാർ നേരിടുന്ന ദ്രോഹങ്ങളെ കുറിച്ച് വ്യക്തമാക്കുന്നതും ഇവരുടെ സുരക്ഷ സംബന്ധിച്ചുമുള്ള ആശങ്കകൾ വെളിപ്പെടുത്തുന്നതുമാണ് ഈ സംഭവം. വിഷയത്തിൽ പോലീസ് അന്വേഷണം ആരംഭിച്ചിട്ടുണ്ട്.
ചന്ദ്വ ടോള പ്രദേശത്ത് നടന്ന പ്രാദേശിക സാംസ്കാരിക പരിപാടിക്കിടെയാണ് സംഭവം. ദൃക്സാക്ഷികളുടെ മൊഴിപ്രകാരം, നർത്തകി വലിയൊരു ജനക്കൂട്ടത്തെ രസിപ്പിക്കുന്നതിനിടെ ആവേശത്തിലായ ചില കാണികൾ സ്റ്റേജിലേക്ക് കയറി. ബഹളത്തിനിടെ, ഇത്തരം പരിപാടികളിൽ പതിവുള്ളതെന്ന രീതിയിൽ ചിലർ നാണയങ്ങൾ യുവതിയുടെ വായിലേക്ക് നിർബന്ധിച്ച് തിരുകുകയായിരുന്നു. ഉടൻ തന്നെ നർത്തകിക്ക് അസ്വസ്ഥത അനുഭവപ്പെടുകയും നില വേഗത്തിൽ വഷളാവുകയും ചെയ്തതോടെ വേദിയിൽ പരിഭ്രാന്തി പരന്നു.
