പ്രധാനമന്ത്രിയുടെ ഓഫീസ് (പിഎംഒ) സ്ഥിതി ചെയ്യുന്ന പുതിയ സംയോജിത സമുച്ചയമായ ‘സേവ തീർത്ഥ്’ പ്രധാനമന്ത്രി നരേന്ദ്രമോദി ഉദ്ഘാടനം ചെയ്തതോടെ രാജ്യത്തിന്റെ ഭരണകേന്ദ്രം പുതിയ വിലാസത്തിലേക്ക് മാറി. സ്വാതന്ത്ര്യലബ്ധിക്കുശേഷം ആദ്യമായാണ് പ്രധാനമന്ത്രിയുടെ ഓഫീസ് ചരിത്രപരമായ സ്ഥലംമാറ്റത്തിന് സാക്ഷിയാകുന്നത്.
പ്രധാന എക്സിക്യൂട്ടീവ് പ്രവർത്തനങ്ങൾ ഒരൊറ്റ കുടക്കീഴിൽ ഏകീകരിച്ച് ഭരണപരമായ കാര്യക്ഷമത വർദ്ധിപ്പിക്കുക എന്ന ലക്ഷ്യത്തോടെയാണ് അത്യാധുനിക സൗകര്യങ്ങളോടെ സമുച്ചയം രൂപകൽപ്പന ചെയ്തിരിക്കുന്നത്. സാങ്കേതിക അടിസ്ഥാനസൗകര്യങ്ങൾ, സുരക്ഷാ സംവിധാനങ്ങൾ, ഏകോപിത ഭരണ സംവിധാനം എന്നിവയെ മുൻനിർത്തിയാണ് ‘സേവ തീർത്ഥ്’ നിർമ്മിച്ചത്.
ഈ മാറ്റം ഭരണഘടനാപരമായ സംവിധാനത്തിൽ ഒരു പുതിയ അധ്യായം തുറക്കുന്നതായി വിലയിരുത്തപ്പെടുന്നു. ചരിത്രപാരമ്പര്യമുള്ള പഴയ കെട്ടിടങ്ങളിൽ നിന്ന് ഭാവിമുഖിയായ സമുച്ചയത്തിലേക്കുള്ള ഈ നീക്കം, ഇന്ത്യയുടെ ഭരണരീതിയിലെ നവീകരണ ചുവടുവയ്പ്പായി കണക്കാക്കപ്പെടുന്നു.
