ഭോപ്പാൽ മെമ്മോറിയൽ ഹോസ്പിറ്റൽ ആൻഡ് റിസർച്ച് സെന്ററിൽ നടന്ന ശസ്ത്രക്രിയയാണ് ഇപ്പോൾ രാജ്യത്തെ ആരോഗ്യ മേഖലയിലെ സംസാര വിഷയം. ഹോസ്പിറ്റലിലെ ഗ്യാസ്ട്രോ സർജറി വിഭാഗം 36 വയസ്സുള്ള സ്ത്രീയിൽ അപൂർവവും സങ്കീർണ്ണവുമായ ശസ്ത്രക്രിയ വിജയകരമായി നടത്തിയിരിക്കുകയാണ്. ശസ്ത്രക്രിയയിൽ സ്ത്രീയുടെ പാൻക്രിയാസിൽ നിന്ന് 15-ലധികം കല്ലുകളാണ് നീക്കം ചെയ്തത്. ചിലതിന് 2 സെന്റീമീറ്റർ വരെ വലിപ്പമുണ്ടായിരുന്നു.
ഗ്യാസ്ട്രോ സർജറി വിഭാഗം അസിസ്റ്റന്റ് പ്രൊഫസർ ഡോ. വിശാൽ പാട്ടീൽ വിശദീകരിക്കുന്നത് ഇങ്ങനെയാണ്, ഉത്തർപ്രദേശിലെ ചിത്രകൂട് സ്വദേശിയായ രോഗി പാൻക്രിയാറ്റിക് ഡക്റ്റ് സ്റ്റോണുകളോട് കൂടിയ ക്രോണിക് പാൻക്രിയാറ്റിസ് ബാധിതയായിരുന്നു എന്നാണ്. ദീർഘകാലമായി സഹിക്കാനാവാത്ത വയറുവേദനയെ തുടർന്നാണ് അവർ ചികിത്സ തേടിയത്. സി.ടി സ്കാനും MRCP പരിശോധനകളും പാൻക്രിയാസിൽ കല്ലുകൾ ഉണ്ടെന്ന് സ്ഥിരീകരിച്ചു.
പാൻക്രിയാസിൽ ഇത്രയധികം കല്ലുകൾ കാണപ്പെടുന്നത് അസാധാരണവും വൈദ്യശാസ്ത്രപരമായി ഗുരുതരവുമാണെന്ന് വിദഗ്ധർ പറയുന്നു. രോഗിയുടെ ആരോഗ്യനിലയിൽ വലിയ പുരോഗതിയുണ്ടാവുകയും ആശുപത്രിയിൽ നിന്ന് ഡിസ്ചാർജ് ചെയ്യുകയും ചെയ്തു.
