ലോകസമാധാനത്തിനായി ലെയോ പതിനാലാമൻ പാപ്പയുടെ ആഹ്വാനം ഏറ്റെടുത്ത് റോം രൂപതയുടെ നേതൃത്വത്തിൽ മാസത്തിലൊരിക്കൽ പ്രാർഥനാ സമ്മേളനങ്ങൾക്ക് തുടക്കമായി. 2026 ജനുവരി 26 തിങ്കളാഴ്ചയാണ് ഈ സമാധാന സംരംഭം ആരംഭിച്ചത്. ഏപ്രിൽ മാസം വരെ എല്ലാ മാസത്തെയും അവസാന തിങ്കളാഴ്ചകളിൽ വൈകുന്നേരം 7:30 – ന് നഗരത്തിലെ ചരിത്രപ്രസിദ്ധമായ ‘ബസിലിക്ക ഓഫ് സാന്താ ക്രോസ് ഇൻ ജെറുസലേം’ ദൈവാലയത്തിലാണ് ഈ സംഗമം നടക്കുന്നത്.
യുദ്ധങ്ങളും അനീതികളും വേട്ടയാടുന്ന ലോകത്ത് സമാധാനത്തിന്റെ വിത്തുകൾ പാകാനാണ് ഈ പദ്ധതിയെന്ന് റോം രൂപത വികാരി ജനറൽ കർദിനാൾ ബൽദാസറെ റെയ്ന പറഞ്ഞു. വിശുദ്ധ ഫ്രാൻസിസ് അസീസിയുടെ 800 -ാം ചരമവാർഷികം ആഘോഷിക്കുന്ന ഈ വർഷം വിശുദ്ധന്റെ സമാധാന സന്ദേശങ്ങൾക്ക് വലിയ പ്രാധാന്യമുണ്ടെന്നും രൂപത വ്യക്തമാക്കി.
പാക്സ്, ക്രിസ്റ്റി തുടങ്ങിയ അന്താരാഷ്ട്ര സമാധാന പ്രസ്ഥാനങ്ങളുടെ സഹകരണത്തോടെയാണ് ഈ പ്രാർഥനാ യോഗങ്ങൾ നടക്കുന്നത്. ലോകമെമ്പാടുമുള്ള സംഘർഷങ്ങളിൽ ദുരിതമനുഭവിക്കുന്നവർക്കായി പ്രാർഥിക്കാനും നീതിയിൽ അധിഷ്ഠിതമായ ലോകക്രമത്തിനായി നിലകൊള്ളാനും ഈ സംഗമങ്ങൾ ആഹ്വാനം ചെയ്യുന്നു.
