കാനഡയിലെ ആൽബർട്ട പ്രവിശ്യയിൽ സ്കൂൾ ലൈംഗിക വിദ്യാഭ്യാസ വിഷയങ്ങളിൽ പുതിയ നിയമപരമായ നിയന്ത്രണങ്ങൾ നിലവിൽ വന്നു. ഇനി മുതൽ ലൈംഗിക വിദ്യാഭ്യാസം, ലിംഗ സ്വത്വം തുടങ്ങിയ വിഷയങ്ങളിൽ ക്ലാസുകൾ എടുക്കുന്നതിന് സർക്കാർ അനുമതി പത്രം നിർബന്ധമാണ്. സ്കൂളിലെ അധ്യാപകർ ഉപയോഗിക്കുന്ന പാഠപുസ്തകങ്ങൾ, വീഡിയോകൾ, അവതരണങ്ങൾ എന്നിവയെല്ലാം വിദ്യാഭ്യാസ മന്ത്രാലയത്തിന്റെ മുൻകൂർ അനുമതി വാങ്ങിയിരിക്കണം.
പുറത്തുനിന്നുള്ള സംഘടനകൾക്കോ വ്യക്തികൾക്കോ സ്കൂളുകളിൽ ലൈംഗിക വിദ്യാഭ്യാസ ക്ലാസുകൾ എടുക്കണമെങ്കിൽ കടുത്ത പരിശോധനകൾക്ക് വിധേയമാകേണ്ടി വരും. 2024-ൽ പാസാക്കിയ എഡ്യൂക്കേഷൻ ഭേദഗതി നിയമം (ബിൽ 27) അനുസരിച്ചാണ് ഈ മാറ്റങ്ങൾ പ്രാബല്യത്തിൽ വരുന്നത്. മാതാപിതാക്കൾക്ക് തങ്ങളുടെ കുട്ടികൾ എന്ത് പഠിക്കണം എന്ന് തീരുമാനിക്കാനുള്ള അധികാരം നൽകാനാണ് ഈ നീക്കമെന്നാണ് സർക്കാർ വാദം.
പുതിയ നിയമപ്രകാരം ലൈംഗിക വിദ്യാഭ്യാസ ക്ലാസുകൾക്കായി മാതാപിതാക്കൾ പ്രത്യേകമായി ‘ഒപ്റ്റ്-ഇൻ’ (Opt-in) സമ്മതം നൽകേണ്ടതുണ്ട്. അതായത് മാതാപിതാക്കളുടെ രേഖാമൂലമുള്ള അനുമതിയില്ലെങ്കിൽ കുട്ടികളെ ഇത്തരം ക്ലാസുകളിൽ പങ്കെടുപ്പിക്കാൻ പാടില്ല. ഇതിനായി അധ്യാപകർ 30 ദിവസം മുമ്പ് തന്നെ രക്ഷിതാക്കൾക്ക് നോട്ടീസ് നൽകണം. മുൻപ് ഉണ്ടായിരുന്ന രീതിയിൽ നിന്നും തികച്ചും വിഭിന്നമായ ഒരു നടപടിയാണിത്.
ഈ തീരുമാനത്തിനെതിരെ കാനഡയിലെ വിദ്യാഭ്യാസ വിദഗ്ധരും മനുഷ്യാവകാശ പ്രവർത്തകരും രംഗത്തെത്തിയിട്ടുണ്ട്. ഇത് വിദ്യാർത്ഥികൾക്ക് കൃത്യമായ ശാസ്ത്രീയ അറിവ് ലഭിക്കുന്നതിന് തടസ്സമാകുമെന്ന് അവർ വാദിക്കുന്നു. പലപ്പോഴും സ്കൂളുകൾ മാത്രമാണ് കുട്ടികൾക്ക് ലൈംഗികാരോഗ്യത്തെക്കുറിച്ച് ശരിയായ വിവരങ്ങൾ നൽകുന്ന ഏക ഉറവിടം. പുതിയ നിയന്ത്രണങ്ങൾ ഈ സുരക്ഷിത സാഹചര്യം ഇല്ലാതാക്കുമെന്ന് വിമർശകർ പറയുന്നു.
ലൈംഗികാതിക്രമങ്ങൾ തടയുന്നതിനും സ്വന്തം ശരീരത്തെക്കുറിച്ച് അവബോധം നൽകുന്നതിനും ഇത്തരം ക്ലാസുകൾ അത്യാവശ്യമാണെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു. എന്നാൽ സർക്കാർ പുറത്തിറക്കിയ പുതിയ മാർഗ്ഗനിർദ്ദേശങ്ങൾ പ്രകാരം പാഠഭാഗങ്ങൾ പ്രായത്തിന് അനുയോജ്യമാണോ എന്ന് പരിശോധിക്കും. ഇതുവരെ നൂറിലധികം പഠന വിഭവങ്ങൾക്ക് സർക്കാർ അനുമതി നൽകിയിട്ടുണ്ടെന്നാണ് വിവരം.
ചില ഗ്രേഡുകളിൽ ക്ലാസുകൾ എടുക്കുന്നതിന് നിലവിൽ പുറത്തുനിന്നുള്ള വിദഗ്ധർക്ക് അനുമതി നൽകിയിട്ടില്ല. ഇത് അധ്യാപകരെ കടുത്ത സമ്മർദ്ദത്തിലാക്കുന്നുണ്ടെന്നും റിപ്പോർട്ടുകൾ സൂചിപ്പിക്കുന്നു. കുട്ടികളുടെ സ്വകാര്യതയെയും അവകാശങ്ങളെയും പുതിയ നിയമം ബാധിക്കുമെന്ന് ചൂണ്ടിക്കാട്ടി ചില സംഘടനകൾ കോടതിയെ സമീപിക്കാൻ ഒരുങ്ങുകയാണ്. കാനഡയിലെ രാഷ്ട്രീയ വൃത്തങ്ങളിലും ഈ വിഷയം വലിയ ചർച്ചയായിട്ടുണ്ട്.
