ബോളിവുഡിലെ പ്രശസ്ത ആക്ഷൻ ചിത്രങ്ങളുടെ സംവിധായകൻ രോഹിത് ഷെട്ടിയുടെ മുംബൈയിലെ വീടിന് സമീപം വെടിവെയ്പ്പ്. ശനിയാഴ്ച രാത്രി വൈകി ജുഹുവിലെ രോഹിത് ഷെട്ടിയുടെ വസതിക്ക് പുറത്താണ് സംഭവം നടന്നത്. നാല് റൗണ്ട് വെടിയുതിർത്തതായാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.
സംഭവത്തിൽ ആർക്കും പരിക്കേറ്റതായി റിപ്പോർട്ട് ചെയ്തിട്ടില്ല. വിവരം ലഭിച്ച ഉടൻ തന്നെ മുംബൈ പോലീസും ക്രൈം ബ്രാഞ്ച് ഉദ്യോഗസ്ഥരും സ്ഥലത്തെത്തി പരിശോധന ആരംഭിച്ചു.
രോഹിത് ഷെട്ടിയുടെ വസതിക്ക് സമീപം വെടിയൊച്ച കേട്ട ഉടൻ തന്നെ പ്രദേശവാസികൾ പരിഭ്രാന്തരായി. പോലീസ് സംഘം സ്ഥലത്തെത്തി പ്രദേശം വളയുകയും സുരക്ഷാ ഉദ്യോഗസ്ഥരെ വിന്യസിക്കുകയും ചെയ്തിട്ടുണ്ട്.
