2014-ൽ നരേന്ദ്ര മോദി ലോക്സഭാ തിരഞ്ഞെടുപ്പിൽ വിജയിച്ചപ്പോൾ ഒരു ബ്രിട്ടീഷ് പത്രം അദ്ദേഹത്തെ ‘ഇന്ത്യയുടെ ആദ്യത്തെ സോഷ്യൽ മീഡിയ പ്രധാനമന്ത്രി’ എന്ന് വിശേഷിപ്പിച്ചിരുന്നു. പന്ത്രണ്ട് വർഷങ്ങൾക്ക് ഇപ്പുറം, സോഷ്യൽ മീഡിയയെ നയതന്ത്ര നീക്കങ്ങൾക്കായി എങ്ങനെ ഫലപ്രദമായി ഉപയോഗിക്കാമെന്ന് പ്രധാനമന്ത്രി മോദി ഒരിക്കൽ കൂടി തെളിയിച്ചിരിക്കുകയാണ്.
ചൊവ്വാഴ്ച ഇന്ത്യയും യൂറോപ്യൻ യൂണിയനും (EU) തമ്മിലുള്ള ചരിത്രപരമായ വ്യാപാര കരാർ പ്രഖ്യാപിച്ചപ്പോൾ മോദി നടത്തിയ ഇടപെടൽ ഇതിന് ഉദാഹരണമാണ്. കരാറിനെക്കുറിച്ചുള്ള വിവരം 24 ഔദ്യോഗിക യൂറോപ്യൻ ഭാഷകളിൽ എക്സ് (X) പ്ലാറ്റ്ഫോമിൽ പോസ്റ്റ് ചെയ്തുകൊണ്ട് യൂറോപ്പിലെ ദശലക്ഷക്കണക്കിന് ആളുകളിലേക്ക് വ്യക്തിപരമായ സന്ദേശം എത്തിക്കാൻ അദ്ദേഹത്തിന് സാധിച്ചു.
ഭാഷാപരമായ ഈ നയതന്ത്ര നീക്കത്തെ ‘മൾട്ടിലിംഗ്വൽ മാസ്റ്റർസ്ട്രോക്ക്’ എന്നാണ് ഭൗമരാഷ്ട്രീയ വിദഗ്ധർ വിശേഷിപ്പിക്കുന്നത്. ഒരൊറ്റ സന്ദേശത്തിലൂടെ യൂറോപ്യൻ യൂണിയനിലെ 27 രാജ്യങ്ങളിലേക്കും നേരിട്ട് എത്താൻ അദ്ദേഹത്തിന് കഴിഞ്ഞു. യുഎസ് പ്രസിഡന്റ് ഡൊണാൾഡ് ട്രംപിന്റെ കടുത്ത വ്യാപാര നയങ്ങൾക്കിടയിൽ, ഇന്ത്യയും ഇയുവും തമ്മിലുള്ള ഈ കരാർ കേവലം ഒരു സാമ്പത്തിക ഇടപാടല്ല, മറിച്ച് ഊഷ്മളമായ ഒരു വ്യക്തിബന്ധത്തിന്റെ അടയാളം കൂടിയാണെന്ന് വിലയിരുത്തപ്പെടുന്നു.
ട്രംപിൻ്റെ വ്യാപാര യുദ്ധവും ഇന്ത്യ-ഇയു കരാറും
ഡൊണാൾഡ് ട്രംപിന്റെ കടുത്ത വ്യാപാര തന്ത്രങ്ങളും ശിക്ഷാനടപടിയായി ഏർപ്പെടുത്തുന്ന താരിഫുകളും ഇന്ത്യയെയും യൂറോപ്പിനെയും ഒരുപോലെ പ്രതിസന്ധിയിലാക്കിയിരുന്നു. ഇന്ത്യ ഇതിനോടകം തന്നെ 50 ശതമാനം താരിഫ് നൽകേണ്ടി വരുന്നുണ്ട്. കൂടാതെ അമേരിക്കയ്ക്ക് അനുകൂലമായ രീതിയിലുള്ള വ്യാപാര കരാറുകൾ ഒപ്പിടാൻ സമ്മർദ്ദവും നേരിടുന്നു.
ഗ്രീൻലാൻഡ് ഏറ്റെടുക്കാനുള്ള ട്രംപിന്റെ നീക്കത്തെ എതിർത്തതിന് യൂറോപ്പും അദ്ദേഹത്തിന്റെ അതൃപ്തിക്ക് പാത്രമായി. സഖ്യകക്ഷികളെ പോലും താരിഫുകൾ ഉപയോഗിച്ച് സമ്മർദ്ദത്തിലാക്കുന്ന ട്രംപിന്റെ രീതി ലോക വ്യാപാര രംഗത്ത് വലിയ ആശങ്ക സൃഷ്ടിച്ചിരുന്നു. ഈ പശ്ചാത്തലത്തിലാണ് 20 വർഷത്തെ ചർച്ചകൾക്ക് ശേഷം ജനുവരി 27-ന് ഇന്ത്യയും ഇയുവും തമ്മിലുള്ള ‘മദർ ഓഫ് ഓൾ ഡീൽസ്’ (Mother of all deals) യാഥാർത്ഥ്യമായത്.
പ്രധാനമന്ത്രിയുടെ എക്സ് പോസ്റ്റ്
കരാർ പ്രഖ്യാപിച്ചതിന് പിന്നാലെ എല്ലാ യൂറോപ്യൻ നേതാക്കൾക്കും നന്ദി പറഞ്ഞുകൊണ്ട് പ്രധാനമന്ത്രി മോദി പോസ്റ്റ് പങ്കുവെച്ചു. “ഇന്ത്യ-ഇയു എഫ്ടിഎ (FTA) പൂർത്തീകരിക്കുന്നത് നമ്മുടെ ബന്ധത്തിലെ സുപ്രധാന നാഴികക്കല്ലാണ്. ഇത് സാധ്യമാക്കിയ യൂറോപ്പിലെ എല്ലാ നേതാക്കളോടും ഞാൻ നന്ദി പറയുന്നു. ഈ കരാർ സാമ്പത്തിക ബന്ധം ദൃഢമാക്കുകയും ജനങ്ങൾക്ക് പുതിയ അവസരങ്ങൾ സൃഷ്ടിക്കുകയും ചെയ്യും,” എന്ന് അദ്ദേഹം ഇംഗ്ലീഷിൽ കുറിച്ചു.
