കോംഗോയിലെ ആഭ്യന്തര കലാപത്തിലും ദക്ഷിണാഫ്രിക്കയിലെ പ്രളയത്തിലും ദുരിതമനുഭവിക്കുന്നവർക്കായി പ്രാർഥിക്കാൻ ലെയോ പതിനാലാമൻ മാർപാപ്പ ആഹ്വാനം ചെയ്തു. ജനുവരി 18 – ന് വത്തിക്കാനിൽ ആഞ്ചലൂസ് പ്രാർഥനയ്ക്ക് ശേഷം സംസാരിക്കുകയായിരുന്നു പാപ്പ.
കിഴക്കൻ കോംഗോയിൽ തുടരുന്ന വംശീയ കലാപവും അക്രമങ്ങളും ജനജീവിതം ദുസ്സഹമാക്കുന്നതിൽ പാപ്പ ആശങ്ക പ്രകടിപ്പിച്ചു. സംഘർഷം മൂലം ആയിരക്കണക്കിന് കുടുംബങ്ങൾ സ്വന്തം വീടുകളിൽ നിന്ന് പലായനം ചെയ്യാൻ നിർബന്ധിതരായി. പലരും അയൽരാജ്യമായ ബുറുണ്ടിയിൽ അഭയം തേടിയിരിക്കുകയാണ്. അഭയാർഥി ക്യാമ്പുകളിൽ ശുദ്ധജലത്തിന്റെയും ഭക്ഷണത്തിന്റെയും അഭാവം മൂലം കോളറ പോലുള്ള പകർച്ചവ്യാധികൾ പടരുന്നതിൽ പാപ്പ ആശങ്ക അറിയിച്ചു.
ആയുധങ്ങൾ ഉപേക്ഷിച്ച് ചർച്ചകളിലൂടെ സമാധാനം കണ്ടെത്താൻ ബന്ധപ്പെട്ട കക്ഷികളോട് പാപ്പ അഭ്യർഥിച്ചു. ദക്ഷിണാഫ്രിക്ക, മൊസാംബിക്, സിംബാബ്വെ എന്നീ രാജ്യങ്ങളിൽ കനത്ത മഴയെത്തുടർന്നുണ്ടായ പ്രളയത്തിൽ നൂറിലധികം പേർ മരിച്ച സംഭവത്തിൽ മാർപാപ്പ അനുശോചനം രേഖപ്പെടുത്തി. ദുരന്തബാധിതർക്കും രക്ഷാപ്രവർത്തനത്തിൽ ഏർപ്പെട്ടിരിക്കുന്നവർക്കും സഭയുടെ പൂർണ്ണ പിന്തുണയും പ്രാർഥനയും പാപ്പ വാഗ്ദാനം ചെയ്തു. കിഴക്കൻ കോംഗോയിൽ പ്രകൃതിദുരന്തവും സംഘർഷവും ഒരേപോലെ ജനങ്ങളെ വേട്ടയാടുകയാണെന്നും സമാധാനവും ഐക്യവും പുനഃസ്ഥാപിക്കാൻ ലോകം ഒന്നിച്ച് നിൽക്കണമെന്നും മാർപാപ്പ ഓർമ്മിപ്പിച്ചു.
