മതത്തിന്റെ പേരിൽ സമാധാനം തകർക്കാൻ ശ്രമിക്കുന്നവർക്കെതിരെ പോരാടാനുള്ള ആയുധമായി കലയെ ഉപയോഗിക്കണമെന്ന് മുഖ്യമന്ത്രി പിണറായി വിജയൻ പറഞ്ഞു. തൃശൂരിൽ 64-ാമത് കേരള സ്കൂൾ കലോത്സവം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കല കേവലം സന്തോഷം നൽകാൻ മാത്രമല്ല, ജീവിതത്തിലെ കയ്പേറിയ അനുഭവങ്ങളെക്കുറിച്ച് ജനങ്ങളെ ബോധവാന്മാരാക്കാനും വർഗീയതയ്ക്കെതിരെ പോരാടാനും ഉപകരിക്കണമെന്ന് മുഖ്യമന്ത്രി ഓർമ്മിപ്പിച്ചു. തൃശൂരിലെ തേക്കിൻകാട് മൈതാനിയിൽ പ്രത്യേകം സജ്ജമാക്കിയ ‘സൂര്യകാന്തി’ വേദിയിലായിരുന്നു ഉദ്ഘാടന ചടങ്ങ്.
ഫ്യൂഡൽ കാലഘട്ടത്തിൽ കലകൾ ചില പ്രത്യേക ജാതികളിലോ മതങ്ങളിലോ മാത്രം ഒതുങ്ങിനിന്നിരുന്നുവെന്നും അയിത്തം പോലുള്ള അനാചാരങ്ങൾ നിലനിന്നിരുന്നുവെന്നും മുഖ്യമന്ത്രി ചൂണ്ടിക്കാട്ടി. എന്നാൽ ജനാധിപത്യത്തിന്റെയും മതേതരത്വത്തിന്റെയും വരവോടെ കലകൾ എല്ലാവരുടേതുമായി മാറി. ഇതിൽ സ്കൂൾ കലോത്സവങ്ങൾ വലിയ പങ്ക് വഹിച്ചിട്ടുണ്ട്.
