ന്യൂഡൽഹി: ഡെലിവറി ജീവനക്കാരുടെ യൂണിയനുകൾ രാജ്യവ്യാപക പണിമുടക്കിന് ആഹ്വാനം ചെയ്തതിന് പിന്നാലെ വേതനം വർധിപ്പിച്ച് ഫുഡ് ഡെലിവറി പ്ലാറ്റ്ഫോമുകളായ സ്വിഗ്ഗിയും സൊമാറ്റോയും. പുതുവർഷത്തലേന്ന് വൈകുന്നേരം ആറുമുതൽ അർധരാത്രി 12 മണിവരെ ജോലി ചെയ്യുന്ന ഡെലിവറി ജീവനക്കാർക്ക് ഓർഡറിന് 120 മുതൽ 150 രൂപ ഇൻസെൻ്റീവ് നൽകുമെന്ന് സൊമാറ്റോ അറിയിച്ചു. വർഷാന്ത്യത്തിരക്ക് പരിഗണിച്ചു സ്വിഗ്ഗിയും ഇൻസെൻ്റീവ് വർധിപ്പിച്ചു. ഫുഡ് ഡെലിവറി പ്ലാറ്റ്ഫോമുകൾ വൻ വരുമാനം പ്രതീക്ഷിക്കുന്ന പുതുവർഷത്തലേന്ന് ഡെലിവറി ജീവനക്കാരുടെ യൂണിയനുകൾ രാജ്യവ്യാപക പണിമുടക്കിന് ആഹ്വാനം ചെയ്തതിനിടെയാണ് സ്വിഗ്ഗിയും സൊമാറ്റോയും വഴങ്ങിയത്.

മികച്ച വേതനവും സുരക്ഷിതമായ ജോലി സാഹചര്യങ്ങളും ഒരുക്കണമെന്ന ആവശ്യമുന്നയിച്ച് ഡിസംബർ 31നാണ് വിവിധ യൂണിയനുകൾ രാജ്യവ്യാപക പണിമുടക്ക് നടത്താൻ തീരുമാനിച്ചത്. തെലങ്കാന ഗിഗ് ആൻ്റ് പ്ലാറ്റ്ഫോം വർക്കേഴ്സ് യൂണിയൻ (ടിജിപിഡബ്ലുയു), ഇന്ത്യൻ ഫെഡറേഷൻ ഓഫ് ആപ്പ് ബേസ്ഡ് ട്രാൻസ്പോർട്ട് വർക്കേഴ്സ് (ഐഎഫ്എടി) എന്നീ യൂണിയനുകളാണ് സമരവുമായി മുന്നോട്ടുപോകാൻ തീരുമാനിച്ചത്.

കഴിഞ്ഞ രാത്രിവരെ 1.7 ലക്ഷത്തിലധികം ഡെലിവറി ജീവനക്കാർ സമരത്തിൻ്റെ ഭാഗമാകുമെന്നും ഇത് ബുധനാഴ്ച വൈകുന്നേരത്തോടെ ഇനിയും കൂടുമെന്നും രണ്ടു യൂണിയനുകളും സംയുക്ത പ്രസ്താവനയിലൂടെ അറിയിച്ചിരുന്നു. ജീവനക്കാരുടെ പണിമുടക്ക് ക്വിക്ക് കൊമേഴ്സ് പ്ലാറ്റ്ഫോമുകളായ സ്വിഗ്ഗി, സൊമാറ്റോ, ബ്ലിങ്കിറ്റ്, ഇൻസ്റ്റാമാർട്ട്, സെപ്റ്റോ എന്നിവയുടെ പ്രവർത്തനത്തെ തടസ്സപ്പെടുത്തുമെന്നും യൂണിയനുകൾ മുന്നറിയിപ്പ് നൽകിയിരുന്നു. ഡിസംബർ 25ന് തെലങ്കാനയിലും മറ്റിടങ്ങളിലും ആയിരക്കണക്കിന് ഡെലിവറി ജീവനക്കാർ പ്രതിഷേധസൂചകമായ പ്ലാറ്റ്ഫോമുകളിൽനിന്ന് ലോഗൗട്ട് ചെയ്തതിന് പിന്നാലെയാണ് രാജ്യവ്യാപക സമരത്തിനും ആഹ്വാനമുണ്ടായത്.

വഴങ്ങി സ്വിഗ്ഗിയും സൊമാറ്റോയും

സൊമാറ്റോയുടെ പ്രഖ്യാപനങ്ങൾ

  • പുതുവർഷത്തലേന്ന് വൈകുന്നേരം ആറുമുതൽ രാത്രി 12 മണിവരെ ജോലി ചെയ്യുന്നവർക്ക് ഓരോ ഓർഡറിനും 120-150 രൂപ ഇൻസെൻ്റീവ്.
  • ഓർഡറുകളുടെ എണ്ണവും ജീവനക്കാരുടെ ലഭ്യതയും അനുസരിച്ചു ഈ ദിവസം 3000 രൂപ വരെ വരുമാനം ഉറപ്പാക്കും.
  • ഓർഡർ നിരസിക്കുന്നതിനും റദ്ദാക്കുന്നതിനുമുള്ള പിഴകൾ താൽക്കാലികമായി ഒഴിവാക്കി.

സ്വിഗ്ഗിയുടെ പ്രഖ്യാപനങ്ങൾ

  • ഡിസംബർ 31 നും ജനുവരി ഒന്നിനും ഇടയിൽ ജോലിചെയ്യുന്നവർക്ക് 10,000 രൂപ വരെ സമ്പാദിക്കാനുള്ള അവസരം.
  • പുതുവത്സരത്തലേന്ന് വൈകുന്നേരം ആറുമുതൽ രാത്രി 12 വരെയുള്ള ആറ് മണിക്കൂറിനുള്ളിൽ 2,000 രൂപ വരെ വരുമാനം.