സംസ്ഥാനത്ത് ശക്തമായ മഴയ്ക്ക് സാധ്യതയില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. എന്നാൽ ഇന്നു മുതൽ തെക്കൻ ജില്ലകളിൽ നേരിയ മഴയ്ക്ക് സാധ്യതയുണ്ട്. മഴ കുറഞ്ഞതോടെ സംസ്ഥാനത്തെ ഹൈറേഞ്ച് മേഖലകളിൽ കനത്ത ശൈത്യം അനുഭവപ്പെട്ടു തുടങ്ങിയിട്ടുണ്ട്. മലയോര മേഖലകളിൽ മാത്രമല്ല, സമതല പ്രദേശങ്ങളിലും ഇപ്പോൾ തണുത്ത കാലാവസ്ഥയാണ് നിലനിൽക്കുന്നത്.
ഡിസംബർ 29-ലെ കണക്കുകൾ പ്രകാരം ദക്ഷിണേന്ത്യയിലെ പ്രധാന വിനോദസഞ്ചാര കേന്ദ്രങ്ങളിൽ അതിശൈത്യമാണ് രേഖപ്പെടുത്തിയിരിക്കുന്നത്. കൊടൈക്കനാലിൽ 7°c താപനില രേഖപ്പെടുത്തിയപ്പോൾ ഊട്ടിയിൽ 7.2 ഡിഗ്രിയും മൂന്നാറിൽ 9.9 ഡിഗ്രിയുമാണ് കുറഞ്ഞ താപനില.
