സംസ്ഥാനത്ത് വീണ്ടും മഴ എത്തുന്നു. 2025 അവസാനിയ്ക്കുന്നതിന് മുൻപ് മഴ പെയ്യുമെന്നാണ് കാലാവസ്ഥാ പ്രവചനം. തെക്കൻ കേരളത്തിലാണ് മഴയ്ക്ക് സാധ്യത. ഇന്ന് പത്തനംതിട്ട ജില്ലയിൽ നേരിയ മഴയ്ക്ക് സാധ്യതയുണ്ട്. ഡിസംബർ 29, 30 തീയതികളാണ് മഴയ്ക്ക് സാധ്യത. തിങ്കളാഴ്ച പത്തനംതിട്ട, ഇടുക്കി ജില്ലകളിൽ മഴ പെയ്തേക്കാം.
ഡിസംബർ 29ന് തിരുവനന്തപുരം, കൊല്ലം, പത്തനംതിട്ട, ഇടുക്കി ജില്ലകളിൽ ഗ്രീൻ അലർട്ട് ആയിരിക്കും. എന്നാൽ വടക്കൻ ജില്ലകളിൽ മഴ സാധ്യതയില്ലെന്നാണ് കാലാവസ്ഥാ നിരീക്ഷണകേന്ദ്രം പുറത്തിറക്കിയ അടുത്ത അഞ്ച് ദിവസത്തെ മഴ മുന്നറിയിപ്പിൽ പറയുന്നത്. മിതമായതോ നേരിയതോ ആയ മഴയാണ് ഗ്രീൻ അലർട്ട്കൊണ്ട് അർഥമാക്കുന്നത്.
ഇടിമിന്നൽ ജാഗ്രതാ നിർദ്ദേശവും പുറപ്പെടുവിച്ചിട്ടുണ്ട്. അതേസമയം സംസ്ഥാനത്തെ ഏറ്റവും ഉയർന്ന പകൽ താപനില കഴിഞ്ഞ ദിവസം കോട്ടയത്ത് രേഖപ്പെടുത്തി. തുടർച്ചയായ മൂന്നാം ദിവസമാണ് രാജ്യത്തെ ഉയർന്ന പകൽ ചൂട് കോട്ടയത്ത് രേഖപ്പെടുത്തുന്നത്. 35.2 ഡിഗ്രി സെൽഷ്യസാണ് കോട്ടയത്ത് രേഖപ്പെടുത്തിയ പകൽ താപനില.
