ബെംഗളൂരു: ഐടി നഗരമായ ബെംഗളൂരുവിൻ്റെ ഗതാഗത സംവിധാനത്തിൻ്റെ കരുത്ത് മെട്രോ സർവീസുകളാണ്. ഗതാഗതക്കുരുക്ക് രൂക്ഷമായ നഗരത്തിൽ ആളുകൾ കൂടുതലായി ആശ്രയിക്കുന്നത് മെട്രോ സർവീസുകളെയാണ്. അതിവേഗം വളരുന്ന ബെംഗളൂരുവിൻ്റെ ഭാവി മുന്നിൽ കണ്ട് മെട്രോ സർവീസുകൾ വ്യാപിപ്പിക്കുകയാണ് സംസ്ഥാന സർക്കാർ. 2035 ഓടെ മെട്രോ ശൃംഖല 466 കിലോമീറ്റർ വരെ വികസിപ്പിക്കാനാണ് പദ്ധതിയിട്ടിരിക്കുന്നത്.
ബെംഗളൂരു മെട്രോയുടെ വികസനം ബംഗളൂരുവിന്റെ അതിവേഗ വളർച്ച സാധ്യമാക്കുകയും ട്രാഫിക് തിരക്ക് ലഘൂകരിച്ച് നഗരത്തിലെ ജനങ്ങളുടെ യാത്രാരീതി മാറ്റിയെടുക്കാനുമുള്ള ഒരു ഗതാഗത സംവിധാനമാണ്. ഇതിൽ നിർണായകമാകുക ബെംഗളൂരു മെട്രോ ബ്ലൂ ലൈൻ ആണ്. ബ്ലൂ ലൈൻ കെംപെഗൗഡ അന്താരാഷ്ട്ര വിമാനത്താവളത്തിലേക്ക് നീട്ടുന്നത് ഗതാഗതക്കുരുക്ക് കുറയ്ക്കാൻ സഹായിക്കും. പ്രതിദിനം ലക്ഷത്തിലധികം വാഹനങ്ങൾ വിമാനത്താവളത്തിലേക്ക് പോകുന്നുണ്ട്. ഈ സാഹചര്യത്തിൽ ബ്ലൂ ലൈൻ അത്രമേൽ പ്രധാനമാണ്.
സെൻട്രൽ സിൽക്ക് ബോർഡിനെ കെആർ പുരം, ഹെബ്ബാൾ വഴി കെമ്പെഗൗഡ അന്താരാഷ്ട്ര വിമാനത്താവളവുമായി ബന്ധിപ്പിക്കുന്ന 58.19 കിലോമീറ്റർ ദൈർഘ്യത്തിൽ 31 സ്റ്റേഷനുകളുള്ള ഒരു ഇടനാഴിയാണ് നമ്മ മെട്രോ ബ്ലൂ ലൈൻ. 2026 ഡിസംബറിനും 2027 ഡിസംബറിനും ഇടയിൽ ഘട്ടം ഘട്ടമായി ഈ റൂട്ട് പൂർത്തീകരിക്കാനാണ് ലക്ഷ്യമിടുന്നത്. വിമാനത്താവളത്തിലേക്കുള്ള യാത്രാ സമയം ഗണ്യമായി കുറയ്ക്കാൻ ഈ റൂട്ടിന് സാധിക്കും. പ്രത്യേക ലഗേജ് റാക്കുകളുള്ള ഡ്രൈവർരഹിത ട്രെയിനുകളാണ് ഈ റൂട്ടിൽ സഞ്ചരിക്കുക.
പ്രധാനപ്പെട്ട റൂട്ടിലെ പ്രധാന സ്ഥലങ്ങളെ ബന്ധിപ്പിക്കുന്നതിലൂടെ നമ്മ മെട്രോ ദൈനംദിന യാത്രകൾ സൗകര്യപ്രദമാക്കുകയും പ്രദേശത്തെ ബിസിനസ്, വ്യാവസായിക പ്രവർത്തനങ്ങൾക്ക് ഉത്തേജനം നൽകുകയും ചെയ്യും. പിങ്ക് ലൈൻ 2026 മുതൽ ഘട്ടം ഘട്ടമായി തുറക്കാൻ സാധ്യതയുണ്ട്. തിരക്കേറിയ താമസസ്ഥലങ്ങളെ പ്രധാന ബിസിനസ് ഹബ്ബുകളുമായി ബന്ധിപ്പിക്കുന്നതിലൂടെ ഈ ലൈൻ ദൈനംദിന യാത്രക്കാർക്ക് സുഗമവും കാര്യക്ഷമവുമായ ഒരു യാത്രാനുഭവം നൽകാനാണ് ലക്ഷ്യമിടുന്നത്.
മെട്രോയുടെ വിപുലീകരണ പദ്ധതികൾക്ക് വലിയ ലക്ഷ്യങ്ങളുണ്ടെങ്കിലും ചില പ്രോജക്ടുകൾ വൈകുകയാണ്. 45 കിലോമീറ്റർ ദൈർഘ്യമുള്ള ഓറഞ്ച് ലൈനിന്റെ നിർമാണം ഡബിൾ ഡെക്കർ ഫ്ലൈഓവർ രൂപകൽപ്പനയെക്കുറിച്ച് അധികൃതർ പഠിക്കുന്നതിനാൽ നിർത്തിവെച്ചിരിക്കുകയാണ്. 36 കിലോമീറ്റർ ദൈർഘ്യമുള്ള റെഡ് ലൈൻ കേന്ദ്ര സർക്കാരിന്റെ അനുമതിക്കായി കാത്തിരിക്കുകയാണ്. ചെലവ് കുറയ്ക്കുന്നതിനായി ഇതിന്റെ രൂപകൽപ്പന മാറ്റിയെഴുതിയിട്ടുണ്ട്.
ബംഗളൂരുവിന്റെ പ്രാന്തപ്രദേശങ്ങളിലേക്ക് അതിവേഗ ഗതാഗത സംവിധാനം എത്തിക്കുന്നതിനായി ബിഎംആർസിഎൽ. (BMRCL) ഏകദേശം 209 കിലോമീറ്റർ പുതിയ മെട്രോ റൂട്ടുകൾ പരിഗണിക്കുന്നുണ്ട്. മാടവര മുതൽ തുമകുരു, ചല്ലഘട്ട മുതൽ ബിഡദി, സിൽക്ക് ബോർഡ് മുതൽ ഹരോഹള്ളി, ബോമ്മാസന്ദ്ര മുതൽ അട്ടിബെലെ എന്നിവയാണ് നിർദിഷ്ട കോറിഡോറുകൾ. മാടവര മുതൽ തുമകുരു വരെയുള്ള 60 കിലോമീറ്റർ ദൈർഘ്യമുള്ള ഇന്റർസിറ്റി മെട്രോയെക്കുറിച്ച് പരിഗണിക്കുന്നുണ്ട്. ഇതിന്റെ ചെലവ് 20,650 കോടി രൂപയാണ്.
ബെംഗളൂരുവിന്റെ ഔട്ടർ റിങ് റോഡ് നഗരത്തിലെ ഏറ്റവും തിരക്കേറിയ വഴികളിൽ ഒന്നാണ്. ഇവിടെ പ്രതിദിനം 4-5 ലക്ഷം വാഹനങ്ങൾ ഗതാഗതക്കുരുക്കിൽ പെടുന്നുണ്ട്. ഈ തിരക്കേറിയ റൂട്ടിൽ നിർമിക്കുന്ന പുതിയ മെട്രോ കോറിഡോർ യാത്രക്കാർക്ക് വിശ്വസനീയമായ ഒരു പൊതുഗതാഗത സംവിധാനം നൽകും. ഇത് ട്രാഫിക് ലഘൂകരിക്കുകയും യാത്രാ സമയം കുറയ്ക്കുകയും ചെയ്യും. ഈ പ്രധാനപ്പെട്ട റൂട്ടിലെ പ്രധാന സ്ഥലങ്ങളെ ബന്ധിപ്പിക്കുന്നതിലൂടെ, മെട്രോ ദൈനംദിന യാത്രകൾ സൗകര്യപ്രദമാക്കുകയും ഈ പ്രദേശത്തെ ബിസിനസ്, വ്യാവസായിക പ്രവർത്തനങ്ങൾക്ക് ഉത്തേജനം നൽകുകയും ചെയ്യും. ബിഎംആർസിഎൽ ഘട്ടം ഘട്ടമായി വികസിപ്പിക്കാനായി 363.3 കിലോമീറ്റർ ഭാവി മെട്രോ കോറിഡോറുകൾ രൂപകൽപ്പന ചെയ്തിട്ടുണ്ട്. ഈ ലൈനുകൾ പുതിയ വളർച്ചാ മേഖലകളിലേക്കും വളർന്നുവരുന്ന പ്രാന്തപ്രദേശങ്ങളിലേക്കും എത്താൻ രൂപകൽപ്പന ചെയ്തിട്ടുള്ളതാണ്.
