ശ്രീലങ്കൻ തീരത്തിനടുത്ത് രൂപപ്പെട്ട അതിതീവ്ര ന്യൂനമർദ്ദം ചുഴലിക്കാറ്റായി മാറിയ ‘ഡിറ്റ്‌വാ’ വടക്കൻ തമിഴ്‌നാട്, പുതുച്ചേരി, തെക്കൻ ആന്ധ്രാപ്രദേശ് തീരത്തേക്ക് നീങ്ങുന്നതായി കേന്ദ്ര കാലാവസ്ഥാ വകുപ്പ് (ഐ.എം.ഡി.) അറിയിച്ചു. നിലവിൽ ഈ ന്യൂനമർദ്ദത്തെ ചുഴലിക്കാറ്റായിട്ടാണ് കണക്കാക്കുന്നതെന്നും, കടുത്ത ചുഴലിക്കാറ്റായി മാറാൻ സാധ്യതയില്ലെന്നുമാണ് അധികൃതർ അറിയിച്ചിട്ടുള്ളത്.
ചുഴലിക്കാറ്റിൻ്റെ കേന്ദ്രഭാഗത്തിനടുത്ത് കാറ്റിന്റെ വേഗത മണിക്കൂറിൽ 60-80 കിലോമീറ്റർ വരെയാകാനും ചിലപ്പോൾ 90 കിലോമീറ്റർ വരെ എത്താനും സാധ്യതയുണ്ട്. പുറം ഭാഗങ്ങളിൽ 35-45 കിലോമീറ്റർ വേഗതയും, ചിലപ്പോൾ 55 കിലോമീറ്റർ വരെയും കാറ്റ് വീശാൻ സാധ്യതയുണ്ട്.
കേരളം, ലക്ഷദ്വീപ്, മാലിദ്വീപ് എന്നിവിടങ്ങളോട് ചേർന്നുള്ള അറബിക്കടലിൻ്റെ ചില ഭാഗങ്ങളിലും സമാനമായ കാറ്റ് വീശാൻ സാധ്യതയുണ്ട്. അടുത്ത അഞ്ച് ദിവസത്തേക്ക് ബംഗാൾ ഉൾക്കടലിലെ വലിയ ഭാഗങ്ങളിൽ നിന്ന് മത്സ്യത്തൊഴിലാളികൾ കടലിൽ പോകരുത് എന്നും മുന്നറിയിപ്പ് നൽകിയിട്ടുണ്ട്.
