തോട്ടുകടവിൽ തുണിനനച്ചു കൊണ്ടിരുന്ന ഗൃഹനാഥനെ നീർനായ കടിച്ചു. തിരുവാർപ്പ് കരിയിൽ കെ.എ എബ്രഹാമിനെയാണ് നീർനായ കടിച്ച് കാൽ വിരലുകൾക്ക് പരുക്കേൽപ്പിച്ചത്. കർഷകനായ എബ്രാഹം പാടത്തു പോയി വന്നതിനു ശേഷം മീനച്ചിലാറിന്റെ കൈവഴിയായ തോട്ടിൽ തുണി കഴുകിക്കൊണ്ടിരുന്നപ്പോൾ കാലിൽ കടിക്കുകയായിരുന്നു. നീർനായ് ആക്രമണത്തിൽ മൂന്ന് വിരലുകൾക്ക് ആഴമായ മുറിവുണ്ട്. ഇന്ന് വൈകുന്നേരം 5.30 നായിരുന്നു സംഭവം. ഉടൻ തന്നെ കോട്ടയം ജില്ലാ ആശുപത്രിയിൽ എത്തിച്ചു. ഈ പ്രദേശത്ത് തോട്ടിൽ നീർനായയുടെ ശല്യം രൂക്ഷമാണ്. ഈ മാസം മാത്രം അഞ്ചു പേരെ നീർനായ് അക്രമിച്ചിട്ടുണ്ടെന്നും പ്രദേശവാസികൾ പറഞ്ഞു.