ശബരിമല അയ്യപ്പൻറെ സ്വർണ്ണം കാണാതെ പോയി. വിജയ മല്യ എന്ന പെരും കള്ളൻ കൊടുത്തത്, അരക്കള്ളന്മാരും, മുക്കാൽ കള്ളന്മാരും അടിച്ചോണ്ടുപോയി. സൂത്രധാരനായ തസ്കര പുംഗവൻ എവിടെയോ മറഞ്ഞിരുന്നു ഊറി ചിരിക്കുന്നുണ്ട്.
“കക്കാൻ പഠിച്ചാൽ പോരാ, നിൽക്കാനും പഠിക്കണം”
എന്ന് മനസ്സിൽ കരുതി.
ഈ സ്വർണ്ണം മുഴുവൻ തൊട്ടുമുമ്പിൽ ഇരുന്നിട്ടും കലിയുഗ വരദൻ ഒന്നുനോക്കിയതുപോലും ഇല്ല.
അല്ലെങ്കിലും അയ്യപ്പനറിയാം,
“കനകം മൂലം, കാമിനി മൂലം, കലഹം ഉലകിൽ സുലഭം” എന്ന്….
ഇതിൽ കാമിനിയെ അയ്യൻ പണ്ടേ ഒഴിവാക്കിയതാണ്. ഇനി ശേഷിച്ച സ്വർണം കൂടി മാറിക്കിട്ടിയാലേ കാനന വാസന് സമാധാനം ആവൂ.
ശബരിമലയിൽ പോയിട്ടുള്ളവർക്കറിയാം എത്രമാത്രം പോലീസ് ഉദ്യോഗസ്ഥരാണ് അവിടെ ഉള്ളതെന്ന്. ഇവരുടെ എല്ലാം മുന്നിൽ കൂടി തൊണ്ടി മുതൽ എത്ര നിസ്സാരമായിട്ടാണ് കടത്തിയത്.
അയ്യോ, അപ്പോൾ ഇതിലും ആയിരകണക്കിന് മടങ്ങ് സ്വർണ്ണം സൂക്ഷിച്ചിരിക്കുന്ന ശ്രീ പദ്മനാഭി ക്ഷേത്രത്തിലെ സ്വർണ്ണമോ?
എ.കെ 47 പിടിച്ചുനിൽകുന്ന പട്ടാളക്കാരാണ് കാവൽക്കാർ.
പക്ഷെ ഇവർക്കറിയുമോ മലയാളികളുടെ കാഞ്ഞ ബുദ്ധി?
അവിടുത്തെ മുതൽ മോഷ്ടിക്കുമ്പോൾ, വെളിയിലേക്ക് കൊണ്ടുപോകാൻ ഇവരെ തന്നെ മുന്നിലും പുറകിലുമായി സുരക്ഷ ഉറപ്പാക്കാൻ നടത്തുമായിരിക്കും. ദേവൻ്റെ മുതൽ അറ്റകുറ്റ പണികൾക്കായി കൊണ്ടുപോകുന്നു എന്ന് അവരെ ധരിപ്പിച്ചാൽ പോരെ?
അല്ലെങ്കിലും, കടം കേറി മുടിഞ്ഞിരുക്കുന്ന ആരെങ്കിലും,
“അമ്പലത്തിൽ സ്വർണ്ണം വെച്ചിട്ടെന്തിന് നാട്ടിൽ കേണുനടപ്പു”
എന്ന് വിചാരിച്ചാൽ കുറ്റം പറയാൻ സാധിക്കുമോ?
എന്തായലും ശതാബ്ദങ്ങൾ കഴിഞ്ഞിട്ടും, ശ്രീ പദ്മനാഭൻ സ്വർണാഭരണങ്ങൾ ഒന്നും എടുത്ത് ഉപയോഗിച്ചിട്ടില്ല. ആരും ഉപയോഗി ക്കാതെ നിലവറയിൽ തന്നെ സൂക്ഷിച്ചിരുന്നാൽ, കാലക്രമേണ ഭൂമികുലുക്കത്തിലോ, സുനാമിയിലോ ഒക്കെ എന്നന്നേക്കുമായി നഷ്ടപ്പെടാനും സാധ്യത ഉണ്ട്.
ഇതിനേക്കാളേറെ നിരീക്ഷിക്കേണ്ടത്, അതി ദൂരം ഭൂമി തുരന്ന് വരാൻ പ്രാഗൽഭ്യമുള്ള തുരപ്പൻ തസ്കരന്മാരെയാണ്.
ഇത്രയും വലിയ സമ്പത്തിന്റെ ഉടമസ്ഥർ അതുപയോഗിച്ച് . മനുഷ്യരാശിയുടെ മുഴുവൻ പുരോഗതിക്കായി ശ്രമിച്ചിരുന്നു എങ്കിൽ എത്ര നന്നായിരുന്നു.
2050 ഓട് കൂടി ഒരുലക്ഷം മനുഷ്യരെ മാഴ്സിൽ എത്തിക്കാനാണ് ഇലോൺ മസ്ക് ശ്രമിക്കുന്നത്. ഇപ്പോഴുള്ള ഏറ്റവും വേഗം കൂടിയ റോക്കറ്റിന് മൂന്നു മാസം കൊണ്ടേ അവിടെ എത്താൻ സാധിക്കൂ.ഇതിലും വേഗം കൂടിയ ബഹിരാകാശ വാഹനം നിർമിച്ച് ഒരു മാസത്തെ യാത്രകൊണ്ട് അവിടെ എത്താനുള്ള ശ്രമങ്ങൾ തുടർന്നുവരുന്നു .
“ശ്രീ പദ്മനാഭ സ്പേസ് റിസർച്ച് സെന്റർ” എന്നപേരിൽ ഒരു സ്ഥാപനം തിരുവനന്തപുരത്ത് നിർമ്മിച്ച് ബഹിരാകാശ ഗവേഷണവും, അന്യഗ്രഹ യാത്രകൾക്ക് വേഗത കൂടിയ റോക്കറ്റുകൾ കണ്ടുപിടിക്കാനുള്ള ശ്രമങ്ങളും ചെയ്യാവുന്നതാണ്. ലോകോത്തര ശാസ്ത്രജ്ഞൻമാരെ വരുത്തി അർഹിക്കുന്ന വേതനം നൽകി, അതോടൊപ്പം തദ്ദേശീയ പ്രതിഭകളെ പ്രോത്സാഹിപ്പിച്ച് ഈ നേട്ടം കൈവരിക്കാവുൻ സാധിക്കും. തുമ്പയിൽ നിന്നും, ചന്ദ്രനിലേക്കും, മാഴ്സിലേക്കും, യൂറോപ്പയിലേക്കും ദിവസവും വണ്ടികൾ പോകുന്നത് ഒന്ന് സങ്കല്പിച്ചു നോക്കൂ.
ഇതെല്ലാം കാണുമ്പോൾ ശ്രീ പദ്മനാഭനും സന്തോഷിക്കാനാണ് സാദ്ധ്യത. കാരണം, മനുഷ്യർ പാലാഴി (Milkyway) കടയാനാണല്ലോ ഈ ശ്രമങ്ങളൊക്കെ ചെയ്യുന്നത്. അല്ലാതെ ഭൂമിക്കടിയിൽ, എങ്ങനെയെങ്കിലുമൊക്കെ നഷ്ടപ്പെടാൻ സാദ്ധ്യതയുള്ള സമ്പത്ത് വെറുതെ സൂക്ഷിച്ചു വച്ചിരിക്കുകയല്ലല്ലോ.