ദക്ഷിണാഫ്രിക്കയ്ക്കെതിരായ രണ്ടാം ടെസ്റ്റിലെ ആദ്യ ഇന്നിങ്സിൽ 201 റൺസിന് പുറത്തായി ഇന്ത്യ. ഇതോടെ ദക്ഷിണാഫ്രിക്കയ്ക്ക് ഇന്നിങ്സിൽ 288 റൺസിന്റെ ലീഡ് ലഭിച്ചു. ഇന്ത്യയ്ക്ക് മുന്നിൽ കൂറ്റൻ ലക്ഷ്യം ഉയർത്തുന്നതിനായി മൂന്നാം ദിനം തന്നെ ദക്ഷിണാഫ്രിക്ക രണ്ടാം ഇന്നിങ്സ് ബാറ്റിങ് ആരംഭിച്ചു.
അർധ സെഞ്ചുറി നേടിയ ഓപ്പണർ യശസ്വി ജയ്സ്വാളാണ് ഇന്ത്യയുടെ ടോപ് സ്കോറർ. 97 പന്തുകൾ നേരിട്ട ജയ്സ്വാൾ 58 റൺസാണ് അടിച്ചത്. വാഷിങ്ടൺ സുന്ദർ 92 പന്തിൽ 48 റൺസ് നേടി. കെ.എൽ. രാഹുൽ (63 പന്തിൽ 22), സായ് സുദർശൻ (40 പന്തിൽ 15), നിതീഷ് കുമാർ റെഡ്ഡി (18 പന്തിൽ 10), കുൽദീപ് യാദവ് (134 പന്തിൽ 19) എന്നിവരാണ് രണ്ടക്കം തൊട്ട മറ്റ് താരങ്ങൾ. ഇന്ത്യയുടെ ഒന്നാം ഇന്നിങ്സിൽ ഏറ്റവും കൂടുതൽ പന്തുകൾ നേരിട്ട ഇന്ത്യൻ ബാറ്ററാണ് കുൽദീപ്.
ധ്രുവ് ജുറേൽ (പൂജ്യം), ഋഷഭ് പന്ത് (ഏഴ്), രവീന്ദ്ര ജഡേജ (ആറ്), ജസ്പ്രീത് ബുംറ (അഞ്ച്), എന്നിവരാണ് പുറത്തായ മറ്റ് താരങ്ങൾ. മുഹമ്മദ് സിറാജ് (രണ്ട് ) പുറത്താവാതെ നിന്നു. ആറു വിക്കറ്റുകൾ വീഴ്ത്തിയ മാർകോ യാൻസൻ്റെ ബോളിങ് പ്രകടനമാണ് ഇന്ത്യയെ തകർത്തത്. 19.5 ഓവറുകൾ പന്തെറിഞ്ഞ മാർകോ യാൻസൻ 48 റൺസ് മാത്രമാണ് വഴങ്ങിയത്. ഭേദപ്പെട്ട തുടക്കം ലഭിച്ച ഇന്ത്യയെ മധ്യനിരയുടെ മോശം പ്രകടനമാണ് കൂട്ടത്തകർച്ചയിലേക്ക് എത്തിച്ചത്. പ്രോട്ടീസ് സ്പിന്നർമാരായ സിമോൺ ഹാർമർ മൂന്നും കേശവ് മഹാരാജ് ഒരു വിക്കറ്റും നേടി.
