ക്രൈസ്തവർ എന്ന നിലയിൽ, നാം സ്വീകരിച്ച ദൈവീക ദാനങ്ങൾക്കനുസരണം, തിരികെ നൽകുവാൻ നാമേവരും ബാധ്യസ്ഥരാണെന്ന കാര്യം ഓർമ്മപ്പെടുത്തിക്കൊണ്ട്, നവംബർ മാസം ഇരുപത്തിരണ്ടാം തീയതി, ജൂബിലിയുടെ ഭാഗമായി, വത്തിക്കാൻചത്വരത്തിൽ, തീർത്ഥാടകർക്കായി, ലിയോ പതിനാലാമൻ പാപ്പാ, അനുവദിച്ച കൂടിക്കാഴ്ചയിൽ സന്ദേശം നൽകി. ജൂബിലിക്കായി എത്തിയ തീർത്ഥാടകരെ അഭിസംബോധന ചെയ്ത പാപ്പാ, ഏവരുടെയും വലിയ ആഗ്രഹത്തിന്റെ സാക്ഷാത്ക്കാരമാണ്, ഈ തീർത്ഥാടനമെന്നതും, അതിനു ഓരോരുത്തരുടെയും ഉള്ളിൽ ഉണ്ടായ ആഗ്രഹത്തിന് കരം തന്നത് കർത്താവാണെന്നും പാപ്പാ പറഞ്ഞു.
വിശുദ്ധ ലൂക്കയുടെ സുവിശേഷം, പന്ത്രണ്ടാം അധ്യായം, 48 മുതൽ 50 വരെയുള്ള തിരുവചന ഭാഗത്തെ ആധാരമാക്കിയാണ് പാപ്പാ സന്ദേശം നൽകിയത്. “അധികം ലഭിച്ചവനില്‍നിന്ന്‌ അധികം ആവശ്യപ്പെടും; അധികം ഏല്‍പിക്കപ്പെട്ടവനോട്‌ അധികംചോദിക്കും.”, എന്ന വചനം എടുത്തു പറഞ്ഞ പാപ്പാ, ഇതുവരെ ജീവിച്ച യാത്രയിൽ നമുക്ക് ലഭിച്ച നിരവധിയായ അനുഗ്രഹങ്ങളെ അനുസ്മരിച്ചു. സഭ മാനുഷിക പരിമിതികളുള്ള ഒരു സമൂഹമാണെങ്കിലും, യേശു ധാരാളം ദാനങ്ങൾ കൊണ്ട് നിറച്ചിരിക്കുന്നുവെന്നും, അതിനാൽ നമ്മിൽ നിന്നും ധാരാളം കർത്താവ് പ്രതീക്ഷിക്കുന്നുവെന്നും പാപ്പാ പറഞ്ഞു. ഇത് വിശ്വാസത്തിന്റെയും, സൗഹൃദത്തിന്റെയും അടയാളമാണെന്നും പാപ്പാ ചൂണ്ടിക്കാട്ടി. ഇത് നമ്മളാൽ സാധിക്കുമെന്ന്, കർത്താവിനു അറിയാമെന്നും പാപ്പാ കൂട്ടിച്ചേർത്തു.
ദൈവസ്നേഹത്തിന്റെ അഗ്നിയാണ് കർത്താവ് കൊണ്ടുവന്നിരിക്കുന്നതെന്നു പറഞ്ഞ പാപ്പാ, നിഷ്‌ക്രിയമായ സമാധാനത്തെ യേശു നമ്മിൽ നിന്നും ഒഴിവാക്കുന്നുവെന്നും ചൂണ്ടിക്കാട്ടി. ‘തനിച്ചായിരിക്കുവാൻ ആഗ്രഹിക്കുന്ന’ അവസ്ഥ യഥാർത്ഥ സമാധാനമല്ലായെന്നും, അത് ദൈവത്തിന്റെ സമാധാനമല്ലെന്നും പാപ്പാ അടിവരയിട്ടു പറഞ്ഞു.
അനീതികളിൽ, അസമത്വങ്ങളിൽ, മനുഷ്യന്റെ അന്തസ്സ് ചവിട്ടിമെതിക്കപ്പെടുന്നയിടങ്ങളിൽ, ദുർബലർക്ക് സംസാരസ്വാതന്ത്ര്യം നിഷേധിക്കപ്പെടുന്നയിടത്ത് നിലപാടുകൾ എടുക്കുവാൻ സാധിക്കണമെന്നും പാപ്പാ ഓർമ്മിപ്പിച്ചു. പ്രത്യാശ എന്നാൽ ഹൃദയത്തിൽ മനസ്സിലാക്കുകയും, കാര്യങ്ങൾ മുമ്പത്തെപ്പോലെ മോശമായി തുടരരുതെന്ന് പ്രവൃത്തികളിലൂടെ കാണിക്കുകയും ചെയ്യുക എന്നതാണെന്നും, ഇത് തന്നെയാണ് ശരിയായ നിലപാടുകൾ എന്നതുകൊണ്ട് അർത്ഥമാക്കുന്നതെന്നും പാപ്പാ പറഞ്ഞു.
അമേരിക്കൻ വംശജയായ, കഴിഞ്ഞ നൂറ്റാണ്ടിൽ ജീവിച്ചിരുന്ന ഡൊറോത്തി ഡേ എന്ന സ്ത്രീയുടെ നിലപാടുകളിൽ കൈവന്ന സമൂഹ പരിവർത്തനത്തെക്കുറിച്ചും പാപ്പാ എടുത്തു പറഞ്ഞു. തന്റെ രാജ്യത്തിന്റെ വികസന മാതൃക എല്ലാവർക്കും ഒരേ അവസരങ്ങൾ സൃഷ്ടിക്കുന്നില്ലെന്ന് മനസിലാക്കുകയും, സമ്പദ് വ്യവസ്ഥയിൽ ധാരാളം ആളുകൾ ഉപേക്ഷിക്കപെടുകയും ചെയ്യുന്നുവെന്നു തിരിച്ചറിയുകയും ചെയ്തത്, ഒരു പത്രപ്രവർത്തകയെന്ന നിലയിൽ സമൂഹത്തെ അറിയിക്കുകയും, നിലപാടുകൾ സ്വീകരിക്കുകയും ചെയ്ത ഒരു മഹദ് വ്യക്തിത്വമാണ് ഡൊറോത്തി ഡേയുടേതെന്നു പാപ്പാ എടുത്തു പറഞ്ഞു.
ഇത് സമൂഹത്തിൽ വലിയ മാറ്റങ്ങൾ കൊണ്ടുവരുവാൻ ഇടയാക്കിയെന്നു അടിവരയിട്ടു പറഞ്ഞ പാപ്പാ, സമാധാന നിർമ്മാതാക്കൾ നിലപാടുകൾ എടുക്കുകയും, അനന്തരഫലങ്ങൾ കൊണ്ടുവരികയും ചെയ്യുന്നുവെന്നും, ഇതാണ് യഥാർത്ഥ പ്രത്യാശയെന്നും ചൂണ്ടിക്കാട്ടി.
