ചെങ്കോട്ടയ്ക്ക് പുറത്ത് സ്ഫോടകവസ്തുക്കൾ നിറച്ച കാർ പൊട്ടിത്തെറിച്ച് 13 പേർ കൊല്ലപ്പെട്ട കേസിൽ, പ്രധാന പ്രതിയായ അമീർ റാഷിദ് അലി ചാവേർ ഡോ. ഉമർ നബിക്ക് താമസിക്കാൻ സുരക്ഷിതമായ വീടും മറ്റ് ലോജിസ്റ്റിക് പിന്തുണയും നൽകിയതായി ദേശീയ അന്വേഷണ ഏജൻസി (എൻ.ഐ.എ) തിങ്കളാഴ്ച ഡൽഹി കോടതിയെ അറിയിച്ചു. നവംബർ 10-നായിരുന്നു സ്ഫോടനമുണ്ടായത്.
സൗത്ത് കശ്മീരിലെ പാമ്പോർ സ്വദേശിയായ അലിയെ പാട്യാല ഹൗസ് കോടതി സമുച്ചയത്തിലെ പ്രിൻസിപ്പൽ ജില്ലാ സെഷൻസ് ജഡ്ജി അഞ്ജു ബജാജ് ചന്ദനയുടെ കോടതിയിൽ കനത്ത സുരക്ഷയോടെയാണ് എത്തിച്ചത്.
മാധ്യമപ്രവർത്തകരെ കോടതി വളപ്പിലേക്ക് പ്രവേശിപ്പിക്കാത്തതിനാൽ നടപടികൾ ‘ഇൻ-കാമറ’ ആയി മാറി. ഗൂഢാലോചനയുടെ മുഴുവൻ വിവരങ്ങളും പുറത്തുകൊണ്ടുവരാൻ അലിയെ കസ്റ്റഡിയിൽ ചോദ്യം ചെയ്യേണ്ടതുണ്ടെന്ന് എൻ.ഐ.എയുടെ റിമാൻഡ് പേപ്പറിൽ പറയുന്നു.
