ഡൽഹിയിലെ ചെങ്കോട്ടയിൽ നടന്ന കാർ സ്ഫോടനത്തിന്റെ നടുക്കത്തിലാണ് രാജ്യം. കേസിന്റെ അന്വേഷണം ദേശീയ സുരക്ഷാ ഏജൻസി (എൻഐഎ) ഏറ്റെടുത്തിരുന്നു. ഇപ്പോഴിതാ അന്വേഷണത്തിലെ നിർണ്ണായക കണ്ടെത്തലുകൾ പുറത്തു വരികയാണ്. കേന്ദ്ര ആഭ്യന്തര മന്ത്രി അമിത് ഷായുടെയും ദേശീയ സുരക്ഷാ ഉപദേഷ്ടാവ് അജിത് ഡോവലിന്റെയും നേതൃത്വത്തിൽ പ്രവർത്തിക്കുന്ന എൻഐഎ കേസിൽ കാര്യമായ വഴിത്തിരിവ് കണ്ടെത്തി.
ജെയ്ഷെ മുഹമ്മദുമായി ബന്ധപ്പെട്ട ഒരു ഭീകരവാദ ഘടകം ഉദ്യോഗസ്ഥർ വെളിപ്പെടുത്തി.ഓപ്പറേഷൻ സിന്ദൂരിനുശേഷം, തീവ്രവാദ സംഘടനകൾ ഇന്ത്യയിൽ അന്തർസംസ്ഥാന ആക്രമണങ്ങൾക്ക് പദ്ധതിയിടുന്നുണ്ട്. 26 പേരുടെ മരണത്തിന് കാരണമായ പഹൽഗാം ഭീകരാക്രമണത്തിന് മറുപടിയായി, ഓപ്പറേഷൻ സിന്ദൂരിനു കീഴിൽ, പാകിസ്ഥാനിലെയും പാക് അധിനിവേശ കശ്മീരിലെയും തീവ്രവാദ കേന്ദ്രങ്ങൾ ലക്ഷ്യമിട്ടുള്ള ആക്രമണങ്ങൾ ഇന്ത്യ നടത്തിയിരുന്നു.
ഫരീദാബാദിൽ നിന്ന് പ്രധാനമായും സ്ഫോടകവസ്തുക്കൾ കണ്ടെടുത്തതുമായി ബന്ധപ്പെട്ട് പിടിയിലായ ഭീകരസംഘടനയുമായി ബന്ധമുള്ള പുൽവാമയിലെ ഡോക്ടർ ഉമർ മുഹമ്മദാണ് ഡൽഹിയിൽ സ്ഫോടനം നടത്തിയ കാർ ഓടിച്ചിരുന്നത്. കുറച്ച് ദിവസങ്ങൾക്ക് മുമ്പ് കശ്മീരിലെ പുൽവാമയിൽ ജെയ്ഷ്-ഇ-മുഹമ്മദിനെ പിന്തുണയ്ക്കുന്ന പോസ്റ്ററുകൾ പതിച്ചതു മുതൽ ഉമർ അന്വേഷണ ഏജൻസിയുടെ നിരീക്ഷണത്തിലായിരുന്നു.
