ബെംഗളൂരുവിലെ പരപ്പന അഗ്രഹാര സെൻട്രൽ ജയിലിൽ ഗുരുതര സുരക്ഷാ വീഴ്ച. ഐ.എസ്. റിക്രൂട്ടർ ഉൾപ്പെടെയുള്ള കുപ്രസിദ്ധരായ തടവുകാർ മൊബൈൽ ഫോൺ ഉപയോഗിക്കുകയും ടെലിവിഷൻ കാണുകയും ചെയ്യുന്ന വീഡിയോ ദൃശ്യങ്ങൾ പുറത്ത്. സംഭവത്തിൽ കർണ്ണാടക മുഖ്യമന്ത്രി സിദ്ധരാമയ്യ അന്വേഷണത്തിന് ഉത്തരവിട്ടു. ജയിലിനുള്ളിലെ വീഡിയോ വൻ വിവാദമായതിന് പിന്നാലെയാണിത്.
അതീവ സുരക്ഷയുള്ള ജയിലിനുള്ളിൽ മൊബൈൽ ഫോൺ ഉപയോഗിക്കുന്നവരിൽ ഭീകര സംഘടനയായ ഐഎസിലെ കുപ്രസിദ്ധ റിക്രൂട്ടർ ജുഹാദ് ഹമീദ് ഷക്കീൽ മന്ന, സീരിയൽ ബലാത്സംഗകാരിയും കൊലയാളിയുമായ ഉമേഷ് റെഡ്ഡി എന്നിവരും ഉൾപ്പെടുന്നു. ദൃശ്യങ്ങളുടെ ആധികാരികത പരിശോധിക്കുന്നതിനും ഉത്തരവാദികളെ തിരിച്ചറിയുന്നതിനുമായി ഒരു ആഭ്യന്തര അന്വേഷണം ആരംഭിച്ചതായി ജയിൽ അധികൃതർ ശനിയാഴ്ച അറിയിച്ചു.
അന്വേഷണത്തിന്റെ ഫലത്തെ അടിസ്ഥാനമാക്കി തുടർനടപടികൾ സ്വീകരിക്കുമെന്ന് വാർത്താ ഏജൻസിയായ പിടിഐയോട് വൃത്തങ്ങൾ പറഞ്ഞു. നിരവധി ഹൈ റിസ്ക് തടവുകാരെ പാർപ്പിക്കുന്ന പരപ്പന അഗ്രഹാര സെൻട്രൽ ജയിൽ പരിശോധന നേരിടുന്നത് ഇതാദ്യമല്ല. ഒക്ടോബറിൽ, കുപ്രസിദ്ധനായ റൗഡിഷീറ്റർ ശ്രീനിവാസ്, ഗുബ്ബച്ചി സീന എന്നും അറിയപ്പെടുന്നു, ജയിലിൽ തന്റെ ജന്മദിനം ആഘോഷിക്കുന്നതിന്റെ വീഡിയോ വൈറലായിരുന്നു.
