ഹരിദ്വാര്: ഓഹരി വിപണിയില് കനത്ത നഷ്ടം നേരിട്ടതിനെ തുടര്ന്ന് എൻജിനിയര് ജീവനൊടുക്കി. കെമിക്കല് എൻജിനിയറായ ലവ് കുമാറാണ് ജീവനൊടുക്കിയത്. സാമ്പത്തിക ബുദ്ധിമുട്ടുകളും സ്വത്ത് തര്ക്കവും മൂലമാണ് താന് ആത്മഹത്യ ചെയ്യുന്നതെന്ന് വ്യക്തമാക്കുന്ന കുറിപ്പ് കണ്ടെത്തിയതായി പോലീസ് പറഞ്ഞു.
അരിഹന്ത് വിഹാര് പ്രദേശത്ത് ബുധനാഴ്ചയാണ് സംഭവം നടന്നതെന്ന് കാങ്കല് പോലീസ് സ്റ്റേഷനിലെ സീനിയര് സബ് ഇന്സ്പെക്ടര് സത്യേന്ദ്ര ഭണ്ഡാരി പറഞ്ഞു.
ലവ് കുമാര് തന്റെ മുറിയിലെ ഹീറ്ററില് കല്ക്കരി കത്തിച്ച് പുക സൃഷ്ടിച്ച ശേഷം അകത്ത് കയറി മുറി പൂട്ടുകയായിരുന്നു. തുടര്ന്ന് ശ്വാസം മുട്ടിയാണ് മരിച്ചത്.
ഇതിനുമുമ്പ്, കാര്ബണ് മോണോക്സൈഡ് ശ്വസിച്ച് ജീവനൊടുക്കുമെന്ന് ഭീഷണിപ്പെടുത്തി ലവ് കുമാര് ഭാര്യയ്ക്ക് വാട്സാപ്പില് സന്ദേശം അയച്ചിരുന്നു. പോലീസ് പറയുന്നതനുസരിച്ച്, ഓഹരി വിപണിയിലെ നഷ്ടത്തില് ഇയാള് വളരെയധികം ദുഃഖിതനായിരുന്നു. മാത്രമല്ല സ്ഥിരം മദ്യപാനിയായിരുന്നു. ഇതേത്തുടര്ന്ന് ഭാര്യയും കുട്ടികളും താമസം മാറിയിരുന്നു.
