താരങ്ങളെ ഉദ്ഘാടനത്തിന് കൊണ്ടു വരുന്നതിനെ വിമർശിച്ച് യു പ്രതിഭ എംഎൽഎ. നാട്ടിൽ ഇപ്പോൾ ഉദ്ഘാടനങ്ങൾക്ക് തുണിയുടുക്കാത്ത താരങ്ങളെ മതിയെന്നാണ് യു പ്രതിഭയുടെ പരാമർശം. കഴിഞ്ഞ ദിവസം കായംകുളത്ത് ഒരു പരിപാടിയിൽ പ്രസംഗിക്കുകയായിരുന്നു യു പ്രതിഭ. എംഎൽഎയുടെ പരാമർശം സോഷ്യൽ മീഡിയയിൽ ചർച്ചയായി മാറുകയാണ്.
”നിർഭാഗ്യവശാൽ നമ്മുടെ സമൂഹത്തിന് സിനിമക്കാരോട് ഒരു തരം ഭ്രാന്താണ്. അത് എന്തിനാണെന്ന് എനിക്ക് മനസിലാകുന്നില്ല. ഉടുപ്പിടാത്ത സിനിമ താരങ്ങളെ ഉദാഘാടനത്തിന് കൊണ്ടു വരുന്നൊരു പുതിയ സംസ്‌കാരം വളർന്നു വരുന്നുണ്ട്. എന്തിനാണത്? ഇത്രയ്ക്ക് വായ്‌നോക്കികളാണോ കേരളത്തിലെ മനുഷ്യർ. തുണിയുടുക്കാത്ത ഒരാൾ വന്നാൽ എല്ലാവരും ഇടിച്ചു കയറും. അത്തരം രീതികൾ മാറണം. തുണി ഉടുത്ത് വന്നാൽ മതി എന്ന് പറയണം. ഇതൊക്കെ പറയുന്നത് സദാചാരം ആണെന്ന് പറഞ്ഞ് എന്റെ നേരെ വരരുത്.” യു പ്രതിഭ പറയുന്നു.
മാന്യമായ വസ്ത്രം ധരിക്കുക എന്നത് നമ്മൾ അനുസരിക്കേണ്ട കാര്യം തന്നെയാണ്. തുണി ഉടുക്കാനും ഉടുക്കാതിരിക്കാനും അവകാശമുള്ള നാട്ടിലാണ് നമ്മൾ ജീവിക്കുന്നത്. നാളെയിപ്പോൾ ദിഗംബരന്മാരായിട്ട് നടക്കാൻ തീരുമാനിച്ചാൽ നമുക്ക് ചോദ്യം ചെയ്യാനൊന്നും പറ്റില്ലെന്നും എംഎൽഎ പറയുന്നു. പിന്നാലെ നടൻ മോഹൻലാൽ അവതാരകനായ റിയാലിറ്റി ഷോയെക്കുറിച്ചും എംഎൽഎ പരാമർശിക്കുന്നുണ്ട്. ഷോയുടേയും നടന്റേയും പേരെടുത്ത് പറയാതെയായിരുന്നു വിമർശനം.
”കേരളത്തിൽ ഇപ്പോൾ വൈകുന്നേരം നടക്കുന്ന ഒരു ഒളിഞ്ഞു നോട്ട പരിപാടിയുണ്ട്. മറ്റുള്ളവർ ഉറങ്ങുന്നത് ഒളിഞ്ഞു നോക്കുകയും അവരുടെ വസ്ത്രം ഇറുകിയതാണോ എന്ന് കമന്റ് ചെയ്യുകയും ചെയ്യുന്നതാണ് പരിപാടി. അനശ്വര നടനാണ് ആ പരിപാടി ചെയ്യുന്നത്. ജനാധിപത്യത്തിൽ വരേണ്ടത് താര രാജാക്കന്മാർ അല്ല, ജനങ്ങൾക്കിടയിൽ പ്രവർത്തിക്കുന്ന പച്ച മനുഷ്യരാണെന്ന് ധൈര്യത്തോടെ പറയാൻ നമ്മൾ തയ്യാറാകണം” എന്നാണ് യു പ്രതിഭ പറഞ്ഞത്.
