തിരുവനന്തപുരം: ഈ വർഷത്തെ പ്ലസ് വൺ ക്ലാസുകൾ ഇന്ന് ആരംഭിക്കും. 3.40 ലക്ഷം വിദ്യാർഥികളാണ് ഹയർ സെക്കണ്ടറി ഒന്നാംവർഷ പ്രവേശനം നേടിയിരിക്കുന്നത്. പ്ലസ് വൺ പ്രവേശനത്തിൻ്റെ മൂന്നാം അലോട്മെൻ്റ് ഞായറാഴ്‌ച പ്രസിദ്ധീകരിച്ചിരുന്നു. ഇന്നലെ വൈകിട്ട്‌ അഞ്ചുവരെ പ്രവേശനം നടന്നു. ഹയർസെക്കണ്ടറിയിൽ ഇത്തവണ പ്രവേശനോത്സവം സംഘടിപ്പിച്ചിട്ടുണ്ട്. സംസ്ഥാനതല ഉദ്ഘാടനം രാവിലെ ഒമ്പതിന് തിരുവനന്തപുരം തൈക്കാട് ഗവ. മോഡൽ ബോയ്‌സ് ഹയർ സെക്കൻഡറി സ്‌കൂളിൽ മന്ത്രി വി ശിവൻകുട്ടി നിർവഹിക്കും.
ഏകജാലക പ്രവേശനത്തിൻ്റെ മുഖ്യഘട്ടത്തിൽ ആകെ 3,12,908 പേർക്കാണ്‌ അലോട്മെൻ്റ് ലഭിച്ചത്‌. മെറിറ്റ് മൂന്നാം അലോട്മെൻ്റിനോടൊപ്പം സ്പോർട്ട്സ് ക്വാട്ട രണ്ടാം അലോട്ട്മെൻ്റ് പ്രകാരമുള്ള അഡ്‌മിഷൻ, കമ്യൂണിറ്റി, മാനേജ്‌മെൻ്റ്, അൺഎയ്ഡഡ് ക്വാട്ട അഡ്‌മിഷൻ എന്നിവയും നടന്നു. ഇവയിലേതുൾപ്പെടെയുള്ള പ്രവേശനങ്ങൾ ജൂൺ 27ന് പൂർത്തീകരിച്ച് ക്വാട്ടകളിലെ വേക്കൻസികൾകൂടി ഉൾപ്പെടുത്തി സപ്ലിമെൻ്ററി അലോട്മെൻ്റ് അപേക്ഷ ക്ഷണിക്കും.
ജൂൺ 16 വൈകുന്നേരം വരെ 2,40,533 വിദ്യാർഥികൾക്ക് ഇതുവരെ സ്ഥിരപ്രവേശനം ലഭിച്ചു. മെറിറ്റ് ക്വാട്ടയിൽ 2,11,785 പേർക്കും, സ്‌പോർട്‌സ് ക്വാട്ടയിൽ 3,428 പേർക്കും, കമ്മ്യൂണിറ്റി ക്വാട്ടയിൽ 13,609 പേർക്കും, മാനേജ്‌മെൻ്റ് ക്വാട്ടയിൽ 6,840 പേർക്കും, അൺഎയ്ഡഡ് ക്വാട്ടയിൽ 3,826 പേർക്കും പ്രവേശനം ലഭിച്ചു. 1,02,646 വിദ്യാർത്ഥികൾ പ്രവേശന വിവരങ്ങൾ രേഖപ്പെടുത്താനുണ്ട്.
- മോഡൽ റസിഡൻഷ്യൽ സ്‌കൂളുകളിൽ പ്രവേശനം നേടിയവർ : 1,045
- കമ്മ്യൂണിറ്റി ക്വാട്ടയിൽ പ്രവേശനം നേടിയവർ : 13,609
- മാനേജ്‌മെന്റ് ക്വാട്ടയിൽ പ്രവേശനം നേടിയർ : 6,840
- അൺ എയിഡഡ് ക്വാട്ടയിൽ പ്രവേശനം നേടിയവർ : 3,826
- എല്ലാ ക്വാട്ടയിലും ഉൾപ്പെടെ ആകെ സ്ഥിരപ്രവേശനം നേടിയവർ : 2,40,533
- ആകെ പ്രവേശനവിവരങ്ങൾ രേഖപ്പെടുത്താനുള്ളവർ : 1,02,646
കമ്മ്യൂണിറ്റി വിവരങ്ങൾ; തെറ്റുകൾ തിരുത്തി അപേക്ഷിക്കാം
കമ്മ്യൂണിറ്റി വിവരങ്ങൾ തെറ്റായി രേഖപ്പെടുത്തിയതിനാൽ പ്രവേശനം നഷ്ടമായവർക്ക് സപ്ലിമെൻ്ററി അലോട്മെൻ്റിൽ തിരുത്തലുകൾ വരുത്തി അപേക്ഷിക്കാം. ജൂൺ 28 ന് വേക്കൻസി വിവരങ്ങൾ പ്രസിദ്ധീകരിക്കും. സ്‌പോർട്‌സ് ക്വാട്ട , കമ്മ്യൂണിറ്റി ക്വാട്ട, മാനേജ്‌മെൻ്റ് ക്വാട്ട എന്നിവയിലെ പ്രവേശനങ്ങൾ ജൂൺ 27ന് പൂർത്തീകരിച്ച് പ്രസ്തുത ക്വാട്ടയിലെ വേക്കൻസികൾ കൂടി ഉൾപ്പെടുത്തിയാണ് സപ്ലിമെൻ്ററി അലോട്ട്‌മെൻ്റിന് അപേക്ഷകൾ ക്ഷണിക്കുന്നത്.
