കോവിഡ് : ഫോമ ഓരോ ജില്ലയിലും അത്യാധുനിക സൗകര്യങ്ങളുള്ള രണ്ടു വെന്റിലേറ്ററുകൾ എത്തിക്കുന്നു

സഹായത്തിന്റെ രണ്ടാം ഘട്ടത്തിൽ വെന്റിലേറ്ററുകൾക്കൊപ്പം ബ്ലാക്ക് ഫംഗസിനെതിരെയുള്ള മരുന്നുകളും സർജിക്കൽ ഗ്ലൗസുകളും ഡോക്ടർമാരുടെ പ്രത്യേക ആവശ്യപ്രകാരം അണുവിമുക്തമാക്കിയിട്ടുള്ള മറ്റ് മെഡിക്കൽ ഉപകരണങ്ങളും കേരളത്തിലെത്തിക്കും. ഇതിനായുള്ള നടപടികൾ ഫോമ ആരംഭിച്ചു.

സഹായത്തിന്റെ ആദ്യഘട്ടമായി പത്ത് വെന്റിലേറ്ററുകളും 500 പൾസ് ഓക്സി മീറ്ററുകളും ഉൾപ്പെടെ ഒന്നരക്കോടി രൂപയുടെ ജീവൻ രക്ഷാ ഉപകരണങ്ങൾ ഇന്നു പുലർച്ചെയുള്ള എമിറേറ്റ്സ് വിമാനത്തിൽ അമേരിക്കയിൽ നിന്നു തിരുവനന്തപുരത്ത് എത്തിയിരുന്നു..

കോവിഡ് പ്രതിസന്ധിയിലുള്ള കേരളത്തിനു കൈത്താങ്ങാകുകയെന്ന ലക്ഷ്യത്തോടെ ആരംഭിച്ച ‘ഒറ്റക്കല്ല, ഒപ്പമുണ്ട് ഫോമാ’ പദ്ധതിയുടെ ഭാഗമായാണ് ഇവ നാട്ടിലെത്തിച്ചത്.

കേരളം പ്രളയക്കെടുതി നേരിട്ടപ്പോൾ വിവിധ പ്രദേശങ്ങളിൽ ബുദ്ധിമുട്ടു നേരിട്ടവർക്കു ഫോമ വീടുകൾ നിർമിച്ചു നൽകിയിരുന്നു. സർക്കാരിനൊപ്പം ഒത്തുചേർന്നു വീടുകൾ നിർമ്മിക്കുക എന്നതായിരുന്നു ഫോമയുടെ രീതിയെന്നു അനിയൻ ജോർജ് പറഞ്ഞു. പ്രളയത്തെ അതിജീവിക്കുന്നതിനായി വലിയ തൂണുകൾ നിർമിച്ച് അതിനു മുകളിലായാണ് ഫോമാ വില്ലേജിലെ വീടുകൾ സ്ഥാപിച്ചത്. അതിനാൽ പിന്നീട് കനത്ത വെള്ളപ്പൊക്കം ഉണ്ടായപ്പോഴും ആ വീടുകൾ ആളുകളെ സംരക്ഷിച്ചു.

ഇപ്പോൾ കോവിഡിന്റെ പശ്ചാത്തലത്തിൽ കൂടുതൽ സംഘടനകളും വ്യക്തികളും സഹായ മനസ്ഥിതിയുമായി മുന്നോട്ടു വരുന്നുണ്ട്. ജൂൺ 30 വരെ സഹായങ്ങൾ സ്വീകരിക്കാനാണ് ഫോമയുടെ ഇപ്പോഴത്തെ തീരുമാനം. ഫോമയുടെ സന്നദ്ധ പ്രവർത്തങ്ങളോട് ഐക്യദാർഢ്യം പ്രഖ്യാപിച്ചും സാമ്പത്തിക സഹായങ്ങൾ നൽകിയും സഹകരിച്ച എല്ലാ അംഗ സംഘടനകൾക്കും വ്യക്തികൾക്കും ഫോമാ എക്സിക്യൂട്ടീവ് കമ്മറ്റി നന്ദി അറിയിച്ചു.