സാക്രമെന്റൊ (കാലിഫോര്‍ണിയ ): അഞ്ചു ദശാബ്ദങ്ങള്‍ക്കു മുമ്ബ് കൊലപാതക പീഡന പമ്ബരകള്‍ കൊണ്ടു അമേരിക്കയെ വിറപ്പിച്ച മുന്‍ പോലീസ് ഓഫീസര്‍ ഗോള്‍ഡന്‍ സ്റ്റേറ്റ് കില്ലര്‍ എന്നറിയപ്പെടുന്ന ജോസഫ് ജെയിംസ് ഡി ആഞ്ചലോയെ (74) പരോളില്ലാതെ ജീവപര്യന്തം തടവിനു ശിക്ഷിച്ചു കൊണ്ട് സാക്രമെന്റല്‍ കൗണ്ടി സുപ്പീരിയര്‍ കോടതി ഉത്തരവിട്ടു.
നാലു ദശാബ്ദങ്ങള്‍ നീണ്ടു പോയ കുപ്രസിദ്ധമായ ഈ കേസില്‍ ശിക്ഷ വിധിക്കാന്‍ കഴിഞ്ഞതില്‍ കോണ്‍ട്ര കോസ്റ്റ കൗണ്ടി ഡിസ്ട്രിക്റ്റ് അറ്റോര്‍ണി ഡയാന ബെല്‍ട്ടണ്‍ സംതൃപ്തി രേഖപ്പെടുത്തി. 1970 മുതല്‍ 1980 വരെ നീണ്ട കാലഘട്ടത്തില്‍ 13 കൊലപാതകങ്ങളും 13 ലൈംഗിക പീഡനക്കേസുകളും തെളിഞ്ഞുവെങ്കിലും ഇതിനു പുറമെ നിരവധി കൊലപാതകങ്ങളും പീഡനങ്ങളും നടത്തിയതായി പ്രതി കോതിയില്‍ സമ്മതിച്ചു.
പ്രതി നടത്തിയ ഒരു കൊലപാതകത്തിന്റെ സ്ഥലത്തു നിന്നും ശേഖരിച്ച ഡി.എന്‍ എ gemeology വെബ് സൈറ്റില്‍ അപ് ലോഡ് ചെയ്താണ് പ്രതിയെക്കുറിച്ചുള്ള സൂചന ലഭിച്ചതെന്ന് അറ്റോര്‍ണി ഡയാന പറഞ്ഞു. 2018-ല്‍ അമേരിക്കയിലെ പ്രമുഖ മാധ്യമങ്ങളില്‍ അതുവരെ തെളിയിക്കപ്പെടാതിരുന്ന കൊലപാതകങ്ങളെ കുറിച്ച്‌ വാര്‍ത്ത പ്രസിദ്ധീകരിച്ചിരുന്നു.
74 വയസുള്ള ഈ മുന്‍ പോലീസ് ഒഫീസര്‍ ഇനി ഒരിക്കലും ജീവനോടെ പുറത്തു വരില്ല എന്നതാണ് തങ്ങള്‍ക്ക് ആശ്വാസം പകരുന്നതെന്നും അറ്റോര്‍ണി ഡയാന കുട്ടിച്ചേര്‍ത്തു.
