കൊവിഡ് വന്നതോടെ പലരുടേയും തൊഴിലിടങ്ങള്‍ സ്വന്തം വീടുകള്‍ തന്നെയാണ്. അതുപോലെ വര്‍ക്ക് ഫ്രം ഹോം ആക്കിയിരിക്കുകയാണ് ബോളിവുഡ് താരം ഷാരൂഖ് ഖാനും. മുംബയിലെ ഷാരൂഖിന്റെ വസതിയായ മന്നത്തിന്റെ ബാല്‍ക്കണിയിലാണ് ഷാരൂഖ് സിനിമാ സെറ്റൊരുക്കിയിരിക്കുന്നത്. വലിയ ക്യാമറകളും, ലൈറ്റും ഫ്രെയിമിട്ട താരത്തിന്റെ ചിത്രങ്ങളാണ് സോഷ്യല്‍ മീഡിയയില്‍ വൈറലാകുന്നത്.
ലോക് ഡൗണിനിടെ കൊവിഡ് പ്രതിരോധ പ്രവര്‍ത്തനങ്ങള്‍ക്ക് പണം സ്വരൂപിക്കുന്നതിനായി കണ്‍സേര്‍ട്ട്, ലൈവ് വീഡിയോസ് എന്നിങ്ങനെ വിവിധ തരത്തിലുള്ള പരിപാടികള്‍ ഷാരൂഖ് ഖാന്‍ ചെയ്തിരുന്നു. ‘സബ് സഹി ഹോ ജായേഗ’ എന്ന ഗാനം പാടി ചിത്രീകരിച്ചിരുന്നു. 2018ല്‍ റിലീസായ ‘സീറോ’ ആണ് ഷാരൂഖിന്റെതായി ഒടുവില്‍ പുറത്തെത്തിയ ചിത്രം. തുടര്‍ച്ചയായി ഷാരൂഖ് ചിത്രങ്ങള്‍ ബോക്‌സോഫീസില്‍ പരാജയപ്പെട്ടതോടെ ഇനി അടുത്തൊന്നും സിനിമ ചെയ്യില്ലെന്നാണ് ഷാരൂഖ് ഖാന്‍ പ്രഖ്യാപിച്ചിരുന്നു. ഇടവേളയ്ക്ക് ശേഷം ഷാരൂഖ് ചെയ്യാന്‍ പോവുന്ന ചിത്രമേതാണ് എന്ന കാര്യത്തില്‍ നിരവധി റിപ്പോര്‍ട്ടുകള്‍ പുറത്ത് വന്നിരുന്നു. ആരാധകരും കാത്തിരിപ്പിലായിരുന്നു. എന്നാല്‍ കാത്തിരിപ്പിന് അവസാനമെന്നോണം ഷാരൂഖ് ഖാന്‍ സംവിധായകന്‍ രാജ്കുമാര്‍ ഹിറാനിയുമായി ഒരുമിക്കുന്നു എന്നാണ് പുതിയ റിപ്പോര്‍ട്ട്. ആമിര്‍ ഖാന്റെ സിനിമാ ജീവിതത്തിലെ വലിയ ഹിറ്റുകളായ ത്രീ ഇഡിയറ്റ്‌സും പികെയും ഒരുക്കിയത് രാജ്കുമാര്‍ ഹിറാനിയാണ്.
