ഹൂസ്റ്റൺ: മധ്യതിരുവിതാംകൂറിലെ ലക്ഷക്കണക്കിന് പ്രവാസികൾക്കും ശബരിമല തീർത്ഥാടകർക്കും ഏറ്റവും പ്രയോജനം ചെയ്യപ്പെടുന്ന, റാന്നിയ്ക്ക് ഏറ്റവും  അടുത്തുള്ള  ചെറുവള്ളിയിൽ ശബരിമല വിമാനത്താവളം യാഥാർഥ്യമാക്കുന്നതിനുള്ള എല്ലാ നടപടികളും ധൃതഗതിയിൽ നടന്നുവരുന്നുവെന്നു റാന്നി എംഎൽഎ രാജു ഏബ്രഹാം പറഞ്ഞു.

ഹൂസ്റ്റൺ റാന്നി അസോസിയേഷന്റെ (എച്ച്‌ആർഎ) ആഭിമുഖ്യത്തിൽ ഓണാഘോഷത്തോടനുബന്ധിച്ച്  നടത്തപ്പെട്ട റാന്നി കുടുംബസംഗമത്തിലാണ്  എംഎൽഎ.ഈ കാര്യം വ്യക്തമാക്കിയത്. ലോകം മുഴുവൻ കോവിഡ് എന്ന മഹാമാരിയുടെ പ്രതിസന്ധികളിൽ കൂടി കടന്നുപോകുമ്പോൾ  ഈ  വര്ഷം ‘വെർച്യുൽ കുടുംബസംഗമമാണ് നടത്തിയത്. സെപ്തംബർ ആറിന് ഞായറാഴ്ച വൈകുന്നേരം 8 മണിക്ക് ആരംഭിച്ച ‘സൂം’ മീറ്റിംഗ് 10:45 വരെ നീണ്ടു നിന്നു. അസ്സോസിയേഷൻ രക്ഷാധികാരി കൂടിയായ റാന്നി എംഎൽഎ രാജു ഏബ്രഹാം മുഴുവൻ സമയവും പങ്കെടുത്ത് സമ്മേളനത്തെ ധന്യമാക്കി

വൈവിധ്യമാർന്ന പരിപാടികൾ കൊണ്ട് ശ്രദ്ധേയമായ കുടുംബ സംഗമത്തിൽ
പ്രസിഡന്റ് ജീമോൻ റാന്നി അദ്ധ്യക്ഷത വഹിച്ചു. മീരാ സഖറിയയുടെ പ്രാർത്ഥനാഗാനത്തോട് കൂടി സംഗമം ആരംഭിച്ചു. സെക്രട്ടറി ജിൻസ് മാത്യു കിഴക്കേതിൽ സ്വാഗതം ആശംസിച്ചു.

രാജു ഏബ്രഹാം  എംഎൽഎ ആഘോഷപരിപടികളുടെ ഉൽഘാടനം നിർവഹിച്ചു. രാഷ്ട്രീയരംഗത്തെ സമഗ്ര സംഭാവനയ്ക്കുള്ള “തിലകൻ സ്മാരക അവാർഡിനു ” അർഹനായ   എംഎൽഎ യെ യോഗം അനുമോദിച്ചു. 2018ലെ മഹാപ്രളയത്തെയും ശക്തമായി അതിജീവിച്ച റാന്നി ഈ കോവിഡ് കാല പ്രതിസന്ധി കൂടുതൽ കരുത്തോടെ അതിജീവിക്കുമെന്ന് എംഎൽഎ പ്രത്യാശ പ്രകടിപ്പിച്ചു.

റാന്നി നിവാസികളും അസോസിയേഷന്റെ അഭ്യുദയകാംഷികളുമായ റവ.ഫാ. ഏബ്രഹാം സഖറിയ (ജെക്കു അച്ചൻ ) റവ.ഫാ.വർഗീസ് തോമസ് (സന്തോഷ് അച്ചൻ),  അസ്സോസിയേഷൻ സ്ഥാപക പ്രസിഡണ്ട് കെ.എസ്.ഫീലിപ്പോസ് പുല്ലമ്പള്ളിൽ,  ഉപരക്ഷാധികാരികളായ ജോയി മണ്ണിൽ, ബാബു കൂടത്തിനാലിൽ, അമേരിക്കയിലെ മറ്റു സ്ഥലങ്ങളിലുള്ള റാന്നി അസ്സോസിയേഷനുകളെ പ്രതിനിധീകരിച്ചു ഷിജു വടക്കേമണ്ണിൽ ( ഫ്രണ്ട്സ് ഓഫ് റാന്നി, ഡാളസ്) തുടങ്ങിയവർ ആശംസകൾ അർപ്പിച്ചു സംസാരിച്ചു. മീര സഖറിയയുടെയും ജോസ് മാത്യുവും അടിപൊളി ഗാനങ്ങൾ ആലപിച്ചു സംഗമത്തെ ധന്യമാക്കി.

തുടർന്ന് “മീറ്റ് ആൻഡ് ചാറ്റ് വിത്ത് എംഎൽഎ” പരിപാടിക്ക് തുടക്കം കുറിച്ചു. 2018 ലെ മഹാപ്രളയ സമയത്ത് ദുരിതത്തിലായ റാന്നി ജനതയ്ക്ക് സ്വാന്തനമേകാൻ 8 ലക്ഷം രൂപയുടെ പ്രവർത്തനങ്ങൾ ചെയ്ത് ഒപ്പം നിന്ന  ഹൂസ്റ്റൺ റാന്നി അസോസിയേഷന്റെ  പ്രവർത്തനങ്ങളെ നന്ദിപൂർവം സ്മരിച്ചുകൊണ്ടായിരുന്നു  എംഎൽഎ പ്രഭാഷണത്തിന് തുടക്കമിട്ടത്. തുടർന്നു നിരവധി ചോദ്യങ്ങളും എംഎൽഎ യുടെ ഉത്തരങ്ങളുമായി സംഗമം മാറി. കോവിഡ് പ്രതിരോധ പ്രവർത്തനങ്ങൾക്കും വെള്ളപ്പൊക്ക രക്ഷാപ്രവർത്തനങ്ങൾക്കും കേരളത്തിന്റെ മാതൃകയായി മാറിയതിനാണ് തിലകൻ സ്മാരക അവാർഡ് ലഭിച്ചതെന്ന് ആദ്ദേഹം ചോദ്യത്തിന് ഉത്തരമായി പറഞ്ഞു.

റാന്നിയിലെ റോഡുകളിലെയും ടൗണുകളിലെയും മാലിന്യപ്രശ്നങ്ങളും അവയുടെ പരിഹാര നിർദ്ദേശങ്ങളും സി.ജി.ദാനിയേൽ  എംഎൽഎ യുടെ ശ്രദ്ധയിൽ പെടുത്തി. മാലിന്യ നിർമാർജനവുമായി ബന്ധപ്പെട്ടു സർക്കാരിന് ചെയ്യുവാൻ കഴിയുന്ന എല്ലാ കാര്യങ്ങളും  റാന്നി മണ്ഡലത്തിൽ ചെയ്യുവാൻ ശ്രമിക്കുന്നുണ്ടെന്നും എല്ലാ പഞ്ചായത്തുകളിലും മാലിന്യ സംസ്കരണത്തിനു വേണ്ട ക്രമീകരണങ്ങൾ ചെയ്തുകഴിഞ്ഞുവെന്നും അദ്ദേഹം പറഞ്ഞു.

വൈസ് പ്രസിഡണ്ട് മാത്യൂസ് ചാണ്ടപ്പിള്ള റാന്നിക്കാർക്ക് അനുഗ്രഹമായി മാറുന്ന ശബരിമല വിമാനത്താവളത്തെപ്പറ്റി ചോദിച്ചപ്പോൾ  വിമാനത്താവളം  യാഥാർത്ഥ്യമാകുന്നതിനു സാധ്യമായ എല്ലാ കാര്യങ്ങളും സർക്കാർ ചെയ്തു കൊണ്ടിരിക്കുന്നുവെന്നും ധുതഗതിയിൽ നടപടികൾ പുരോഗമിക്കുന്നുവെന്നും പറഞ്ഞു. ശബരിമല വിമാനത്താവളത്തെ സംബന്ധിച്ചും റാന്നിയ്ക്ക് ഏറ്റവും അടുത്ത  ചെറുവള്ളി പ്രദേശത്തിന്റെ സാധ്യതകളെ പറ്റിയും നിയമസഭയിൽ ആദ്യ സബ്മിഷൻ അവതരിപ്പിക്കുവാൻ കഴിഞ്ഞതിൽ അഭിമാനം ഉണ്ടെന്നും  എംഎൽഎ  പറഞ്ഞു. നെടുമ്പാശ്ശേരി മാതൃകയിൽ പൊതുജന പങ്കാളിത്തത്തോടെയാകും വിമാനത്താവളം നിർമ്മിക്കുകയെന്നും എംഎൽഎ പറഞ്ഞു.

നാളിതു വരേയുള്ള തന്റെ നിയമസഭാ പ്രവർത്തനങ്ങളെ പറ്റി സംക്ഷിപ്‌തമായി പ്രതിപാദിക്കുവാൻ റോയ് മാത്യു ആവശ്യപ്പെട്ടപ്പോൾ എംഎൽഎ ആവേശഭരിതനായി മാറി. റാന്നിയിൽ ഒരു ഇന്ഡസ്ട്രിയൽ പാർക്ക് ഉണ്ടായിക്കാണാനുള്ള സ്വപ്നവും റോയ് പങ്കു വച്ചു.

വൈസ് പ്രസിഡണ്ട്  ബിജു സഖറിയ, വൈസ് പ്രസിഡണ്ട് ഷിജു ജോർജ് തച്ചനാലിൽ,  എബ്രഹാം ജോസഫ് (ജോസ്) ,റജി വി.കുര്യൻ, വിനോദ് ചെറിയാൻ , രാജു .കെ.നൈനാൻ, ശാമുവേൽ സ്റ്റീഫൻ, ഷീജ ജോസ്, സജി ഇലഞ്ഞിക്കൽ, ഷൈല സ്റ്റീഫൻ, സുനിൽ വർഗീസ്, റീന സജി. ബിജു തച്ചനാലിൽ,  രാജു തേലപ്പുറത്ത്‌, സജി തച്ചനാലിൽ,സുനിൽ അട്ടത്തറ   തുടങ്ങിയവർ ചർച്ചകളിൽ സജീവമായി പങ്കെടുത്തു.

അമേരിക്കയിലെ മുതിർന്ന മാധ്യമ പ്രവർത്തകൻ പി.പി.ചെറിയാൻ, റോയ് മേടയിൽ (ലോസ് ആഞ്ചലസ് ) രാജു മേടയിൽ (ലോസ് ആഞ്ചലസ്), ഷിബു വടക്കേമണ്ണിൽ (ന്യൂയോർക്ക്)ഷിബു പുല്ലമ്പള്ളിൽ (കണക്റ്റികട്ട്) ലീലാമ്മ ഫിലിപ്പോസ് (റാന്നി) മാത്യു വർഗീസ് (മുംബൈ) തുടങ്ങിയവർ അതിഥികളായി പങ്കെടുത്ത് കുടുംബസംഗമത്തെ ഈടുറ്റതാക്കി.

സെക്രട്ടറി ബിനു സഖറിയ നന്ദി പ്രകാശിപ്പിച്ചു. തുടർന്ന് കുടുംബസംഗമത്തിൽ  പങ്കു ചേർന്ന 50ൽ പരം കുടുംബംഗങ്ങളിലെ അംഗങ്ങൾ തമ്മിൽ കുടുംബ നാട്ടുവിശേഷങ്ങൾ പങ്കുവച്ച് ഓർമ്മകൾ അയവിറക്കി 10.45 നു സംഗമം പര്യവസാനിച്ചു. .

റിപ്പോർട്ട് : ജീമോൻ റാന്നി