ഡല്‍ഹി: കൊവിഡ് കേസുകളും കൊവിഡ് മരണങ്ങളും ഇന്ത്യയ്‌ക്ക് പിടിച്ചുനിര്‍ത്താനായതായി കേന്ദ്ര ആരോഗ്യമന്ത്രി ഡോ ഹര്‍ഷവര്‍ദ്ധന്‍. ലോക്‌സഭയിലാണ് അദ്ദേഹം ഇക്കാര്യം അറിയിച്ചത്. കൊവിഡ് കേസുകള്‍ 10 ലക്ഷത്തില്‍ 3328, കോവിഡ് മരണം 10 ലക്ഷത്തില്‍ 55 എന്ന നിരക്കിലേക്കെത്തിക്കാന്‍ നമുക്ക് സാധിച്ചു. കൊവിഡ് വ്യാപനം തടയുന്നതിനായി ഇന്ത്യ നിരവധി വഴികള്‍ നടപ്പിലാക്കിയിട്ടുണ്ടെന്നും അദ്ദേഹം പാര്‍ലമെന്റില്‍ വിശദീകരിച്ചു.
രാജ്യത്ത് പ്രഖ്യാപിച്ച നാല് മാസത്തെ ലോക്ക്‌ഡൗണിലൂടെ 14 ലക്ഷം മുതല്‍ 29 ലക്ഷം വരെ കൊവിഡ് കേസുകളും 37,000 മുതല്‍ 78,000 വരെ കൊവിഡ് മരണങ്ങളും ഒഴിവാക്കാന്‍ കഴിഞ്ഞു. നാല് മാസത്തെ ലോക്ക്ഡൗണ്‍ ആരോഗ്യരംഗത്തെ അടിസ്ഥാനസൗകര്യങ്ങള്‍ വര്‍ദ്ധിപ്പിക്കുന്നതിനും മനുഷ്യവിഭവശേഷി വികസിപ്പിക്കുന്നതിനും സാധിച്ചു. പി.പി.ഇ കിറ്റ്. എന്‍ 95 മാസ്‌ക്, വെന്റിലേറ്ററുകള്‍ തുടങ്ങിയവ കൂടുതല്‍ ഉത്‌പാദിപ്പിക്കാന്‍ രാജ്യത്തിന് കഴിഞ്ഞു.
